Ákimderdiń halyqpen kezdesýi – bılik pen qoǵam arasynda dıalog ornatatyn mańyzdy baǵyt

NUR-SULTAN. QazAqparat – Ákimderdiń halyqpen kezdesýi – bılik pen qoǵam dıalogyn ornatatyn mańyzdy baǵyt. Mundaı pikirdi «Rýhanı jańǵyrý» qazaqstandyq qoǵamdyq damý ınstıtýtynyń basqarma tóraǵasy Qazbek Maıgeldınov bildirdi, dep habarlaıdy QazAqparat tilshisi.

«Ákimderdiń halyqpen kezdesýi – bılik pen qoǵamnyń, ásirese óńirlerdegi dıalogyn ornatýǵa negizdelgen keri baılanystyń mańyzdy baǵyty. Jańa ózgeristerge sáıkes, ákimder kezdesý aıaqtalǵannan keıin azamattardy jeke qabyldaıdy. Sodan keıin problemaly máseleler júıelenip, olardy qarjylandyrý máslıhat sessııasynda qarastyrylady. Osylaısha, Qazaqstan Respýblıkasynyń barlyq eldi mekeninde tıisti óńirlerdiń basshylyq quramymen kezdesýler ótedi», - dep jazdy ol Facebook paraqshasynda

Onyń atap ótýinshe, kezdesýler halyqtyń talabymen jáne kúntizbeden tys qajet bolǵan jaǵdaıda ótkizilýi múmkin.

Eger buǵan deıin ondaı kezdesýler esep berý úshin ǵana uıymdastyrylsa, endi bul mindetti shart bolady.

Buǵan qosa, turǵyndardyń talabymen kezdesý birneshe márte ótýi de múmkin.

«Bul rette azamattardyń belsendi ustanymy da mańyzdy. Sonymen qatar barlyq deńgeıdegi ákimder toqsan saıyn resmı ınternet-resýrstarda jáne «elektrondy úkimet» veb-portalynda kezdesý barysynda halyq kótergen problemaly máselelerdiń sheshilý barysy týraly aqparat jarııalaýy tıis. Halyqpen sóılesip, olardyń máselelerin sheshý qajet. Tetikteri belgilendi. Eń bastysy - oryndalýy jáne baqylanýy», - dedi Qazbek Maıgeldınov.

Aıta keteıik, búgin Memleket basshysy Qasym-Jomart Toqaevtyń ákimderdiń halyqpen kezdesýlerin ótkizý týraly Jarlyǵynyń tolyq mátini jarııalanǵan bolatyn.