Ákimder saılaýynyń naýqanynda 42 aryz-shaǵym tústi - OSK

ASTANA. 10 tamyz. QazAqparat - Aýyl ákimderiniń saılaý naýqany barysynda 42 aryz-shaǵym tirkeldi. Bul týraly búgin QR Prezıdenti janyndaǵy Ortalyq kommýnıkatsııalar qyzmetinde aýyl ákimderiniń saılaýyna qatysty ótken brıfıngte QR Ortalyq saılaý komıssııasynyń múshesi Tatıana Ohlopkova málim etti.

«Kelip túsken aryzdardyń 18-i túsindirý sıpatynda, al 24-i shaǵymdar bolyp tabylady. Onyń ishinde Ortalyq saılaý komıssııasyna 15 aryz tirkelse, 27-i aýmaqtyq saılaý komıssııalaryna túsken», - dedi T. Ohlopkova. Onyń aıtýynsha, saılaý ótken 14 oblystyń 7-eýinen bir de bir aryz túspegen.

«Sany jaǵynan kelsek, olardyń basym bóligi Ońtústik Qazaqstan oblysynyń aýmaqtyq saılaý komıssııalaryna tıesili, bul - 16 aryz. Eger shaǵymdar sıpatyna kelsek, bulardyń basym bóligi negizinen ákimder tarapynan usynylǵan kandıdattardy alyp tastaýǵa qatysty bolyp tabylady. Al basqa shaǵymdar saılaý komıssııasynyń jumys barysyna qatysty emes, saılaý úderisine qatysy joq ákimderdiń áreketine qatysty bolyp otyr. Úsh shaǵym ákimniń jergilikti qaýymdastyq usynǵan kandıdattardy qoldamaýyna baılanysty týyndaǵan. Qalǵan shaǵymdar jergilikti jurtshylyq tarapynan ákimderdiń usynǵan kandıdattaryn qoldamaýǵa qatysty boldy», - deıdi OSK múshesi.

Osy rette T. Ohlopkova Ortalyq saılaý komıssııasyna telefon qońyraýy arqyly túsetin aýyzsha shaǵymdar da eskeriletinin aıta kele, olardyń barlyǵy tirkelip, jedel jaýaptar beriletinin, shapshań sharalar qabyldanatynyn jetkizdi.