Ákimder el basshylyǵynyń tapsyrmasyn súlesoq oryndap otyr

NUR-SULTAN. QazAqparat - Ákimder el basshylyǵynyń Jer qory týraly biryńǵaı málimetter bazasyn qurý tapsyrmasyn súlesoq oryndap otyr. Bul týraly onlaın brıfıng barysynda QR Sybaılas jemqorlyqqa qarsy is-qımyl agenttigi Strategııa jáne jedel basqarý departamentiniń basshysy Nurlan Jaqsymbetov aıtty, dep habarlaıdy QazAqparat tilshisi.

«Búginde Qazaqstanda memlekettik qyzmetterdiń 88 paıyzy elektrondy túrde kórsetiledi. Bir qaraǵanda, qomaqty kórsetkish. Biraq, bıznes úshin joǵary jemqorlyq táýekelder naqty memlekettik organdar qaǵaz túrinde ǵana kórsetetin qalǵan 12 paıyz qyzmetterde jatyr. Eń aldymen olar: jer qatynastary, sáýlet, qurylys jáne aýyl sharýashylyǵy taýarlaryn óndirýshilerge sýbsıdııa berý kezinde aýyl sharýashylyǵy», - dedi ol.

Onyń atap ótýinshe, bos jer ýchaskeleri týraly ashyq málimetterdiń bolmaýy úlken problemaǵa aınalǵan. Sebebi bul qazaqstandyq jáne sheteldik ınvestorlar úshin bıznes-jobalaryn josparlaýdaǵy mańyzdy máseleniń biri sanalady.

«El basshylyǵynyń birneshe ret Jer qory týraly biryńǵaı málimetter bazasyn qurýdy tapsyrǵanyna qaramastan ákimdikter áli kúnge deıin bul tapsyrmaǵa óte súlesoq qarap keledi. Óńirlerde qurylǵan geoportaldar ashyǵyn aıtqanda ınvestorlar úshin múldem paıdasyz», - dedi Nurlan Jaqsymbetov.

Onyń atap ótýinshe, kásipkerler tarapyna tabıǵı monopolııalar sýbektileriniń qyzmetine qatysty da shaǵym kóp. Bıznesin endi bastaǵan árbir kásipker sý, jylý, gaz tartýda qıyndyqtarǵa tap bolyp jatady.