Ákimder azyq-túlik baǵasyna qatysty yqpal etý sharalaryn qabyldamaǵan - Sultanov
«2019 jyly áleýmettik mańyzy bar azyq-túlik taýarlaryna baǵanyń ósýi 10,4 paıyzdy qurady. Bıylǵy jyldyń qańtar aıynda biz maýsymdyq baǵanyń 0,3% paıyzǵa óskenin baıqaımyz. Bul rette, ol ótken jylǵy qańtarǵa qaraǵanda eki ese tómen jáne aldyńǵy jyldardyń alǵashqy aılaryndaǵy baǵanyń ósýimen salystyrmaly. Atalǵan ósimderdiń sebepterin aıtatyn bolsaq. Astyq túsiminiń tómendeýine jáne eksporttyń ulǵaıýyna baılanysty obektıvti faktorlardy esepke almaǵanda, olar baǵa monıtorıngi jáne jedel sharalar qabyldaý boıynsha ákimdikterdiń jetkiliksiz belsendiligin kórsetedi», - dedi ol.
Mınıstrdiń aıtýynsha, ótken jyly barlyq óńirlerde shekti baǵadan asqan 67 jaǵdaı tirkeldi. Biraq, birde-bir ákimdik ruqsat etilgen shekti baǵany bekitý rásimderin qoldanbaǵan jáne saýda nysandaryna zańmen belgilengen yqpal etý sharalaryn qabyldamaǵan. Qańtar aıynda shekti baǵadan asyp túsken qaıtadan 7 jaǵdaı tirkeldi. Alaıda ákimdikter tarapynan taǵy da eshqandaı is-qımyl bolǵan joq.
«Mysaly, Qostanaı oblysynda jalpy áleýmettik mańyzy bar taýarlar baǵalarynyń 0,7 paıyzǵa tómendeýine qaramastan, taýyq eti jáne jumyrtqa boıynsha baǵanyń bekitilgen sheginen artqany baıqalady», - dedi Baqyt Sultanov.