Ákim Tarazı Ulttyq kitaphanaǵa myńǵa jýyq kitap tabys etti (FOTO)

ASTANA. QazAqparat - Jazýshy, Memlekettik syılyqtyń ıegeri, dramatýrg Ákim Tarazı búgin Ulttyq Akademııalyq kitaphanaǵa óziniń jazǵan kitaptary, sondaı-aq, jeke kitaphanasynda jınaǵan óte qundy kitaptardy tartý etti. «Ózimde bary 4 myń kitap edi, búgin myńǵa jýyǵyn osy kitaphanaǵa tapsyrdym»,-deıdi Ákim aǵanyń ózi.

Jalpy, Ákim Tarazı stýdent kezinen-aq kitap jınaı bastaǵan. Jazýshy kórkem ádebıetti erekshe jaqsy kóredi, sondaı-aq, tarıhı kórkem shyǵarmalardy da jınaǵan. Búgin ómir boıy jınaǵan kitaptarynan iriktep, Ulttyq akademııalyq kitaphanaǵa 979 kitapty syıǵa tartý etti.

«Oqy, oqy jáne oqy» degen ardaqty Paıǵambarymyz Muhammedtiń (s.ǵ.s.) ósıeti. Keńes zamanynda ony Lenınniń sózi dep burmalady. Shyn máninde, Muhammed Paıǵambarymyzdyń bizge ósıet etkeni - oqý, bilý. Jastarǵa aıtarym da osy - jalyqpaı oqyńdar. Men Tolstoıdyń «Anna Karenınasyn» eki ret, «Voına ı Mır» kitabyn eki ret qaıtalap oqydym. Oqyǵan saıyn qabyldaý ózgeshe bolady»,-deıdi Ákim Tarazı.

Ákim Tarazıdiń Ulttyq kitaphana tapsyrǵan kitaptarynyń arasynda ózi jazǵan «Mustafa Shoqaı», «Mahabbat jyry», «Qorqaý juldyz» sııaqty romandary bar.

Ákim Tarazı «Jaza» atty ataqty romany úshin 1989 jyly «QR Memlekettik syılyǵynyń ıegeri» atanǵan. Al 2011 jyly dramatýrg «Álem ádebıetin damytýǵa qosqan úlesi úshin» Frants Kafka atyndaǵy halyqaralyq ádebı syılyqtyń laýreaty atanǵan.