Ákim kreslosy muragerlikpen berilmeıdi - Berdibek Saparbaev aýyl ákimine eskertý jasady
Kezdesý barysynda aýyl turǵyny Gúlzaǵıra Eshmaǵambetova aýyl ákimi Zúbarjat Qamıevanyń jumysyn synǵa alyp, sheneýniktiń sózi men isi arasynda alshaqtyq kóp ekenin ashyna jetkizdi.
Onyń aıtýynsha, turǵyndar ákimniń óz ornyn bosatýyn talap etip otyr. Óıtkeni ol bar máseleni sheshpek túgili, aýyldastarynyń sózine qulaq asqysy da kelmeıdi.
Eldi mekenniń taǵy bir turǵyny Gúldarııa Aqbasovanyń sózine sensek, aýyl ákimi azamattar arasyndaǵy alaýyzdyqqa yqpal etýde.
«Sońǵy kezderi ákimimiz aramyzdaǵy qarym-qatynasqa keri áser etip júr. Onyń jalǵyz maqsaty - aýyl ákiminiń ornynan aıyrylmaý. Aýyldyq Mádenıet úıi uzaq ýaqyttan beri jumys istemeıdi. Alaıda ákimniń týystary sol jerden jalaqy alýda. Bul az deseńiz, ol aýyl turǵyndarynyń jartysyn qorqynyshpen ustap otyr. Biraq shydamnyń da shegi bar, biz endi barlyq jaqqa barýǵa daıynbyz», - deıdi áıel.
Myńaral aýyldyq okrýgi janyndaǵy Myńaral stansasynyń turǵyny Naǵıma Aqjolova sońǵy 35 jylda aýylda eshqandaı ózgeris bolmaǵanyn alǵa tartady. Áıeldiń aıtýynsha, ákim ózekti máselelerdi sheshýde eshqandaı bastama kótermeıdi.
«Ol kóshe dárethanasynyń mektep ishinde ornalasýy boıynsha eshqandaı jumys júrgizbedi. Zúbarjat Qamıevanyń ákesi 20 jyl boıy aýyldyq okrýgti basqardy. Ózi jeti jyldan beri ákim bolyp júr», - deıdi ashýly turǵyn.
Al, Erlan Baıjomartov sheneýniktiń jáne Myńaral aýylyndaǵy qoǵamdyq keńes tóraǵasynyń zańsyz áreketterine narazy.
- Aýyl turǵyndary birneshe ret ákimniń esep berý kezdesýlerine qanaǵattanarlyqsyz degen baǵa berdi. Zúbarjat Talǵatqyzy qanshalyqty zań aıasynda jumys istep otyrǵandyǵyn tekserýlerińizdi suraımyz. Aýylda narazylyq bastalsa boldy, ákim kezekti demalysyna nemese dekretke shyǵyp ketedi, - deıdi Erlan Baıjomartov.
Jergilikti sheneýnikterdiń is-áreketin muqııat qadaǵap otyratyn aqsaqaldar keńesiniń tóraǵasy Bazarbaı Bókenov aýyl ákiminiń basqarý qabiletiniń tómendigin jáne óz jaýapkershiligin sezine almaıtynyn jasyrmady. Aýyl turǵyndary aýyl ákimin qyzmetten bosatýdy talap etýde. Bul - qarapaıym halyqtyń basty talaby.
Turǵyndardy tolǵandyrǵan barlyq máseleni muqııat tyńdaı kele, oblys basshysy jaqyn arada aýyl ákimine qatysty másele óz sheshimin tabatynyna sendirdi.
- Ákimniń kreslosy muragerlik boıynsha berilmeıdi. Jeti jyl - aýyldy abattandyrý, turǵyndarǵa tıisti jaǵdaı jasaý úshin jetkilikti merzim. 2013 jyldan bastap ákim tek tórt eski elektr baǵanasyn aýystyrdy. Sonda aýyldaǵy 96 baǵandy aýystyrý úshin qansha ýaqyt qajet? Zýbarjat Talǵatqyzy, siz Prezıdentke shaǵym jazdyńyz. Alaıda, sizdiń áreketińiz zańǵa qaıshy. Munda barlyq shaǵymdardy tekseretin arnaıy komıssııa jiberemiz. Eger zańsyz áreketter rastalsa, sheneýnik zań aıasynda jaýapkershilikke tartylady. Biz shaǵyn aýyl turǵyndarynyń bir-birimen arazdasýyna jol bermeımiz, - dedi aımaq basshysy.
Kezdesýdi qorytyndylaı kele oblys ákimi aýyl turǵyndary kótergen máselelerdiń barlyǵy memlekettik baǵdarlamalar aıasynda sheshiletinin tilge tıek etti.