Ákim kásipkerlerdi týǵan aýyldaryna bet burýǵa shaqyrdy

KÓKShETAÝ. QazAqparat - Aqmola oblysynyń ákimi Málik Myrzalın jumys saparymen Birjan sal aýdanynda boldy, dep habarlaıdy QazAqparat tilshisi ákimdiktiń baspasóz qyzmetine silteme jasap.

Óńir basshysy aldymen, bıyl paıdalanýǵa berilgen 80 oryndyq Nevskıı orta mektebin aralap kórdi. Bıylǵy jyldan bastap jaratylystaný-matematıkalyq baǵyttaǵy bıologııa, ınformatıka, fızıka pánderi úsh tilde oqytyla bastady. Atalmysh pánderge arnalǵan pán kabınetteri qazirgi zamanǵy talaptarǵa sáıkes jabdyqtalǵan.

Sonymen qatar, aımaq basshysy «QazGerQus» seriktestiginiń jańa astyq saqtaıtyn qoımasy, qasaphana jáne astyq jınaý jumystarymen tanysty. Budan keıin, irgesi sonaý 1928 jyly qalanǵan aýdandyq aýrýhanada boldy, sondaı-aq, shırek ǵasyr boıy qaraýsyz qalǵan kópqabatty eki turǵyn úıdegi qalpyna keltirý jumystaryna nazar aýdardy. Onyń birine qarjy jergilikti bıýdjetten bólinse, ekinshisine jeke kásipkerdiń esebinen alynyp otyr.

  Sapary sońynda aýdan aktıvimen bıýdjettiń oryndalýy jáne aýyl sharýashylyǵyna baǵyttalǵan jerlerdi tıimdi paıdalaný máseleleri jóninde keńes ótkizdi. Jıynda oblys basshysy Elbasynyń taıaýdaǵy  halyqqa Joldaýynan týyndaıtyn mindetter jóninde aıta kele, sol mindetterdi oryndaý jóninde naqtyly tapsyrmalar berdi. Sondaı-aq, jańadan salynatyn aýdandyq emhananyń, deneshynyqtyrý-saýyqtyrý kesheni men turǵyn úıdiń jobalyq-smetalyq qujatyn jedeldetip daıyndaýdy tapsyrdy.

«Aýdan ortalyǵynda kóp jyldardan beri turǵyn úı salynbaýy syn. Táýelsizdik alǵannan beri Stepnıak qalasynda byltyr ǵana 21 páterli túrǵyn úı ǵana berilgen.  Osymen toqtap qalmaý kerek. Árıne, qazirge eski úılerdiń qalpyna keltirilip jatqandyǵy qýantady, biraq, bul jetkiliksiz»,-dep atap ótti M.Myrzalın.

Aımaq basshysynyń aıtýynsha, aýdannan qaıtarym bolǵan soń, kómektesý qajet. 2017 jyly oblystyq bıýdjetten aýdannyń damýyna 400 mıllıon teńge bólindi. 2018 jyly bul kórsetkish 515 mıllıon teńgege jetti. Maqsatta transfertterden kiris kólemi 110 paıyzdy qurady, ıaǵnı, aýdannan oblys bıýdjetine qaıtarym bar degen sóz.

Kórsetilip jatqan memlekettik qoldaýdy eskere otyryp,  bıznes ókilderiniń de áleýmettik jaýapkershiligi bolýy tıis.

«Mańyzdysy óziń bıznespen aınalysyp otyrǵan aýdannyń damýyna úles qosý. Mysaly Qorǵaljyn aýdanynda aýyl turǵyndary ózderi birlesip, qazirgi zamanǵa saı stadıon saldy. Al, sizderdiń aýdandaryńyzda kersinshe, stadıondy aram shóp basyp ketken. Sondyqtan, memleketten kómek kútip otyrmaý kerek. Ár adam óziniń týǵan aýylynyń damýyna at salysýy kerek», - dep qorytyndylady aımaq basshysy.