Ákim almatylyqtardy «Bıýdjetke qatysý» jobasyna belsendi qatysýǵa shaqyrdy

ALMATY. QazAqparat - «Bıýdjetke qatysý» jobasy arqyly turǵyndar qala keńistigin jaqsartý jónindegi jobalarǵa belsendi atsalysyp keledi. Bul týraly qala ákimi Baqytjan Saǵyntaev «Almaty» telearnasyndaǵy Akimat Live baǵdarlamasynyń tikeleı efırinde aıtty, dep habarlaıdy QazAqparat tilshisi.

B. Saǵyntaev osy joba aıasynda turǵyndardyń bastamalary men usynystary negizinde jalpy quny 14,5 mlrd teńge bolatyn 333 jobaǵa ótinish berilgenin aıtty.

2020 jyly jalpy quny 1,4 mlrd teńge bolatyn 55 joba iske asady.

«Búgingi efırdi paıdalanyp, almatylyqtardy «Bıýdjetke qatysý» jobasyna belsendi qatysýǵa shaqyramyn. Keler jyly oryndalatyn jobalarǵa da irikteý júrgiziledi. Qazirgi kezde ótinishter qabyldanýda. Ózderińizdiń aýlalaryńyz ben yqshamaýdandaryńyzda qandaı jobany júzege asyrý qajettigin ózderińiz sheshetin bolasyzdar», - dedi Almaty ákimi.

Byltyr ár aýdanǵa 500 mıllıon teńgege qarajat qarastyrylǵan bolatyn. Búginde «Bıýdjetke qatysý» jobasynyń somasyn eki ese kóbeıtý máselesi qarastyrylyp jatyr.