Aqyly joldyń dárethanasyn tazalaýshylar qansha aılyq alyp júr
«Biz ol qarajatty joldy kútip ustaýǵa jumsadyq. Odan soń qosymsha tehnıka alýǵa jumsaldy. Joldy kútip ustaýdyń ishinde dárethanalardy kútip ustaýǵa jaratqan joqpyz. Jańa da aıttym. Jalpy respýblıkalyq joldardy kútip ustaýǵa 80 mlrd teńge qajet. Bizdiń byltyr tapqan aqshamyz — 30 mlrd teńge. Taǵy 50 mlrd teńge jetpeı otyr. Ol — tek joldyń ózin kútip ustaý shyǵyndary ǵana», — dedi mınıstr Úkimet otyrysynan keıin ótken baspasóz máslıhatynda.
Onyń aıtýynsha, bizdegi sýyq dárethanalar sońǵy jyldary salyndy. 30-40 jyl buryn salynǵandary da bar. Burynǵysy eski joldardyń boıynda boldy.
Jalpy elde eski tásilmen salynǵan 761 salqyn dárethana bar.
«Endi olardyń barshasyn jańalaý kezeń-kezeńimen júrip jatyr. Osy kúnge deıin eskilerdiń ornyna 108 jańa, jyly dárethana qoıyldy. Bıyl taǵy 48 dárethana ornatylady», — dedi Marat Qarabaev.
Sondaı-aq, ol atalǵan dárethanalardy kútip ustaýshylarǵa qansha aılyq tólenetinin aıtty.
«Bir dárethanany kútip ustaýǵa sol jaqtaǵy kisilerge 300 myń teńge tólep otyrmyz. Ol da jetpeıdi. Óıtkeni 24 saǵat boıy eki adam kezekpen isteıdi. Bir adam basyna 150 myń teńge degen sóz. Sol jaqtaǵy jaqyndaý aýyldardan adam taýyp, solarǵa tólep otyrmyz», — dedi mınıstr.
Marat Qarabaev bul adamdar «QazAvtoJol»» qyzmetkerleri emes ekenin, kelisimshart boıynsha ǵana jumys isteıtinin aıtty.