Aqyly joldarda kim tegin júre alady

<p>ASTANA. KAZINFORM — Avtomobıl joldary týraly zańnyń 5-2- babyna sáıkes keı sanattar aqyly avtomobıl jolyn paıdalanǵany úshin aqy tóleýden bosatylady. </p>

Qyzmettik mindetterin oryndaǵan kezde:

• jedel medıtsınalyq járdem uıymdarynyń;
• avarııalyq-qutqarý qyzmetteriniń;
• quqyq qorǵaý organdarynyń;
• kóliktik baqylaý organdarynyń;
• arnaýly memlekettik organdardyń;
• Qarýly Kúshteriniń, basqa da áskerler men áskerı quralymdardyń;
• jalpyǵa ortaq paıdalanylatyn halyqaralyq jáne respýblıkalyq mańyzy bar aqyly avtomobıl joldaryn kútip ustaý jáne olarǵa tehnıkalyq qyzmet kórsetýdi tikeleı júzege asyratyn ulttyq operatordyń;
• Qazaqstan zańnamasyna sáıkes aıqyndalǵan, tıisti aqyly avtomobıl jolynda (ýchaskesinde) kútip-ustaýdy jáne tehnıkalyq qyzmet kórsetýdi tikeleı júzege asyratyn kontsessıonerdiń arnaýly avtokólik quraldary.

Qala mańyndaǵy qatynasta jáne aqyly avtomobıl jolyna irgeles eldi mekenderde:

— kentterdi, aýyldardy aýdan nemese oblys ortalyqtarymen, astanamen nemese respýblıkalyq mańyzy bar qalalarmen qosatyn qatynastarda jolaýshylar men bagajdy turaqty tasymaldaıtyn avtobýstar;

— aqyly avtomobıl jolyna irgeles aýdandardyń atalǵan ákimshilik-aýmaqtyq birlik aýmaǵynda belgilengen tártippen tirkelgen avtobýstary bir aýdan sheginde júrip-turý úshin;

— júk avtokólik quraldary, ózdiginen júretin dońǵalaqty aýylsharýashylyq, melıoratsııalyq mashınalar taıaý kólikke arnalǵan aıryqtary arasyndaǵy jol kesindileri sheginde sý tosqaýyldary men temir joldardy kesip ótý úshin;

— aqyly avtomobıl jolyna irgeles aýdandardyń jeke jáne zańdy tulǵalarynyń atalǵan ákimshilik-aýmaqtyq birlik aýmaǵynda belgilengen tártippen tirkelgen jeńil avtomobılderi bir aýdan sheginde júrip-turý úshin;

Sondaı-aq Ekinshi dúnıejúzi soǵysy ardagerleriniń jeńil avtomobılderi bosatylady.

Kórsetilgen kólikterdiń memlekettik nómiri joǵaryda kórsetilgen sanattarǵa sáıkes mamandandyrylǵan toptarǵa engiziledi. 

Aqyly joldaǵy jol qozǵalysy arkalardaǵy kameralarǵa jazylyp, júıede jol aqysy alynbaıdy.

Bul jeńildikti alý úshin joǵaryda atalǵan sanat ókilderi QazAvtoJolǵa kólik  memlekettik nómirlerin, sondaı-aq avtobýstardyń marshrýt paraqtaryn qosyp, resmı ótinim jiberý kerek.

Qazaqstanda jalpy uzyndyǵy 3221 shaqyrym bolatyn 17 aqyly ýchaske bar.

Onyń 11 ýchaskesi І tehnıkalyq sanatta (2161 shaqyrym), al 6 ýchaske (1060 shaqyrym) ІІ jáne ІІІ tehnıkalyq sanatqa jatady.