Aqyly joldar tarıfi qymbattaıdy – Kólik mınıstri

<p>ASTANA. KAZINFORM &ndash; Elimizdegi aqyly joldardyń tarıfi kóteriledi. Bul týraly Kólik mınıstri Marat Qarabaev aıtty.</p>

«Iá, bıyl negizgi tranzıttik dálizder aıaqtalady. Onyń uzyndyǵy - 2 091 shaqyrym. Sondyqtan da eń birinshiden, taǵy 1 800 shaqyrym jańa ýchaskede aqy alý júıesi engiziledi. Ekinshi – tarıfti arttyrý jaǵyna qaraı qaraý. Iá, sózsiz qarastyratyn bolamyz. Nelikten ekenin túsindireıin. Sebebi, 2013 jyldan beri tarıf 11 jyl boıy ózgergen joq. Ótken jyly 20 paıyzǵa qymbattady. Bizdiń tarıfti kórshi elmen salystyrsańyzdar, Qazaqstanda - 1 teńge 20 tıyn bolsa, Reseıde - 7 teńge. Sizder salyq tóleýshilerdiń emes, «QazAvtoJoldyń» bıýdjeti esebinen bolǵanyn qalaısyzdar ǵoı. Onda bir ǵana joly bar, ol – aqyly joldar tarıfin kóterý», - dedi mınıstr Senattyń jalpy otyrysynan keıin BAQ ókilderiniń saýalyna oraı.

Degenmen, ol aqyly joldar tarıfi kúrt qymbattamaıtyndyǵyn basa aıtty. 

«Sizderge sheginiń birden eselenbeıtindigin aıttym ǵoı. Jekelegen adamdar 2-3 ese kótereıik deıdi. Men birden 2-3 ese bolmaıtyndyǵyn aıttym. Degenmen, paıyzben bolady. Mamandarymyz joldy kútip ustaý, qosymsha 1 100 tehnıka satyp alý úshin qansha qarajat kerektigin esepteıdi. Árıne, munyń bárin birden aqy alýǵa qospaımyz», - dedi ol. 

Sonymen qatar mınıstr aqyly joldar tarıfi qashannan bastap kóterilýi múmkin ekendigin aıtty. 

«Bul másele zańǵa sáıkes 14 kún talqylaýǵa shyǵarylatyn NQA portalyna ornalastyrylady. Qoǵammen talqylaımyz. Talqylaýdy naýryzda bastaýdy josparlap otyrmyz», - dedi Marat Qarabaev.