Ákesin óltirmek bolǵan tólebılik turǵynǵa sot úkimi shyqty

TÚRKІSTAN. QazAqparat- Túrkistan oblysy qylmystyq ister jónindegi mamandandyrylǵan aýdanaralyq sotynda adam óltirýge oqtalý faktisi boıynsha uıymdastyrylǵan qylmystyq is qaraldy, dep habarlaıdy QazAqparat tilshisi.

Oqıǵa Tólebı aýdanynda bolǵan. Jergilikti turǵyn aýdandaǵy bank bólimshesinen birneshe ret taýar nesıesin rásimdegen. Alaıda, jumyssyz bolǵandyqtan, aı saıyn ony qaıtarýǵa múmkindigi bolmaıdy.

Al, ákesi qatal kisi bolǵandyqtan, odan aqsha suraı almaǵan jáne nesıesin aıtýǵa qoryqqan. Nesıeden qutylý úshin jáne paıda tabý maqsatynda ákesin qasaqana óltirip, onyń atyndaǵy mal sharýashylyǵyn ıemdenýge qylmystyq nıeti týyndaǵan. Sodan aldyn ala sóz baılasqan tanystary ákesin qasaqana óltirmek bolady. «Qorada bir qoı óleıin dep jatyr» degen syltaýmen shaqyryp, denesine pyshaq urǵan. Jábirlenýshi ómirine qaýip tónip turǵanyn sezip artqa sheginip, kúrek sabymen qorǵana bastaǵan. Nátıjesinde, jábirlenýshiniń ómirine qaýip tóndiretin densaýlyqqa aýyr dárejede zııan keltirilgen.

«Olardyń kinási kýágerlerdiń aıǵaqtarymen, saraptama qorytyndylarymen, oqıǵa bolǵan jerdi qaraý hattamalarymen, bettestirý hattamalarymen jáne zattaı dáleldemelermen áshkerelendi», - delingen Túrkistan oblystyq sotynyń baspasóz qyzmeti taratqan habarlamada.

Sot úkimimen sottalýshylar joǵaryda atalǵan qylmystyq quqyq buzýshylyqtardy jasaǵany úshin kináli dep tanyldy. Jasalǵan áreketterdiń qoǵamdyq qaýiptiligin jáne sottalýshylardyń jeke basyn eskere otyryp, naqty bas bostandyǵynan aıyrý túrindegi jaza taǵaıyndaldy. Atap aıtqanda, kúdikti Qylmystyq kodekstiń 28-babynyń 3,5-bólikteri, 24-babynyń 3-bóligi, 99-babynyń 2-bóligi 7,8-tarmaqtaryna saı sottaldy. Ol 11 jyl 3 aı merzimge bas bostandyǵynan aıyryldy.

Aıta keteıik, úkim zańdy kúshine enbegen.