«Ákesimen jasty adamǵa judyryq jumsaǵan buzaqy ustaldy» - BAQ-qa sholý
***
«Egemen Qazaqstan» gazetiniń jazýynsha, Jambyl oblysy Qordaı aýdanynda erekshe elektr stansasy iske qosyldy. Bul - elimizdegi kún sáýlesinen qýat alatyn alǵashqy elektr stansasy. Bul stansa Otar kentiniń mańaıyna ornalasqan. Óıtkeni «Qazgıdromettiń» derekteri kún qýatyn paıdalaný úshin bul jerdiń aýa raıy óte-móte qolaıly ekenin rastaıdy. Stansa qurylysy ótken jyldyń mamyr aıynda bastalǵan. Jaqynda onyń qýaty 504 kılovatqa jetetin alǵashqy kezegi iske qosyldy.
Osy basylymda «Daýyldan keıin» degen taqyryppen materıal berildi. «Oblystyq tótenshe jaǵdaılar jónindegi departamenttiń málimeti boıynsha, ótken senbi kúni turǵan qatty daýyl Jambyl óńirindegi ınfraqurylymdarǵa 2,5 mıllıard teńge kóleminde zalal keltirgen. «Biraq bul soma budan da óse túsýi múmkin», deıdi arnaıy komıssııa músheleri. Joǵary kerneýli baǵandardy qulatyp, avtokólikterdi aýdaryp tastaǵan daýyl kezinde barlyǵy 31 adam ártúrli deńgeıde jaraqat alypty. Olardyń 23-ine medıtsınalyq kómek kórsetilip, 8-i aýrýhanaǵa jatqyzylǵan. Eń bastysy, adam shyǵyny oryn alǵan joq»,-dep jazady gazet. Oblys ákiminiń birinshi orynbasary Kárim Kókirekbaevtyń basshylyǵymen tótenshe jaǵdaıǵa baılanysty oblystyq shtab óz jumysyn odan ári jalǵastyrýda. Daýyl ótinde qalǵan aýdandar men olardyń ortalyqtarynda aıtyp kelmeıtin apattan bolǵan zardaptar qalpyna keltirilýde. Búginde Qarataý qalasyndaǵy barlyq nysandarǵa jylý berilip, ortalyq qazandyq keste boıynsha jumys istep tur. Baılanys júıeleri de iske qosyldy.
***
«Aıqyn» basylymynda «Aty-jóndi jazýda nege birizdilik joq?» degen taqyryppen saýalnama jasalǵan. Onda saıasattanýshy Ázimbaı Ǵalıdiń sózine qaraǵanda, qazirgi kezde azamattardyń aty-jónin jazýda birizdiliktiń bolmaýy kópshilikte orysshyldyq basym da, qujatty aýystyrýǵa nıet joq. Azamattar bul jumystyń mashaqatynan qashady. Sodan keıin memlekettik jiger bolmaı tur. «90-jyldary men ózimniń aty-jónimdi qazaqsha áriptermen jazdyryp alǵam. Alaıda keıinnen bank sekildi qarjylyq uıymdardaǵy qujattarymda qazaqsha qaripterdiń ornynda bos oryndar júrgenin baıqadym. Sonda meniń aty-jónimniń úsh árpi joq. Qazirgi zamanda qazaqsha qaripterdi tanıtyn tehnıkany ornatýǵa mundaı uıymdardyń qarjylyq jaǵdaıy jetedi emes pe? Al qarapaıym azamattar keńes dáýirinen qalǵan «ov», «ev»-tardan arylǵysy kelse de, osyndaı kedergilerden ótetin tabandylyq jetispeıdi. Bul máselede memleket ne bitiredi eken dep kútpeı, árkim óz esiminiń durys jazylǵanyn qadaǵalaýy kerek. Menińshe, birinshi adamnyń esimi, sodan keıin ákesiniń ne atasynyń aty jazylǵany durys. Al laqap attary bolsa, ol jaqshaǵa alynsyn»,-deıdi ol.
Sonymen qatar «Aıqyn» gazetinde «Buzaqylyq jasaǵan Bopataev ustaldy» degen taqyrypta materıal berilgen. Esterińizge sala keteıik, 10 qańtar kúni Almatyda Áýezov pen Shevchenko kósheleriniń qıylysynda bolǵan jaǵymsyz oqıǵany telearnalar arqyly respýblıka jurtshylyǵy kórip, rýlde otyrǵan qarııany Ford Focus kóligi ıesiniń soqqylaı bastaǵan jat qylyǵyna ashynǵany anyq. Tipti egde áıel de buzaqynyń judyryǵynan zardap shekti. Al osy oqıǵaǵa kýá bolǵandardyń eshqaısysy azamattarǵa arashashy bolmaǵany ókinishti...
Іle-shala Almaty qalasynyń tártip saqshylary osy oqıǵa boıynsha kúdiktini izdeýge kiristi. Al keshe qalalyq ishki ister departamenti baspasóz qyzmetiniń jetekshisi Saltanat Ázirbek buzaqylyq jasaǵan azamattyń ustalǵanyn habarlady. «1981 jyly týǵan Baqytjan Bopataev - Bostandyq aýdanynyń turǵyny. Ony Almaly aýdanynyń tártip saqshylary buzaqylyǵy úshin ustady»,- dedi ol.
***
«Alash aınasy» basylymynyń jazýynsha, dál qazir qyrǵyz-ózbek shekarasyndaǵy jaǵdaı jazdyń aptap ystyǵyndaǵy shólden qýraǵan sary shópke uqsap tur - órtke qaýipti. «Kez kelgen kishigirim kıkiljiń eki eldiń arasyndaǵy iri deńgeıli janjaldarǵa ulasyp ketýde. Jańa jyldan beri ala shapandy aǵaıyndar men aıyr qalpaqty kórshilerdiń arasynda birneshe daý kóterilip úlgerdi»,-dep jazady basylym.