Aqedil Toıshanuly: Elbasy maqalasy tarıhymyzdy tanýdyń zamanaýı ádis-tásilderin usyndy

ASTANA. QazAqparat - Tarıhty aqtarsaq mádenıetimizdiń bıik deńgeıde ekenin anyq sezinýge bolady. Elbasynyń «Uly dalanyń jeti qyry» maqalasyna qatysty kóppen birge folklortanýshy, Halyqaralyq Túrki akademııasynyń ǵylymı qyzmetkeri, fılologııa ǵylymdarynyń kandıdaty Aqedil Toıshanuly da pikirin bildirdi, dep habarlaıdy QazAqparat tilshisi.

«Jalpy, budan buryndaǵy Elbasynyń «Tarıh tolqynynda» degen eńbeginde de tarıhqa boılaý, jas urpaqqa ult tarıhyn uqtyrý máselesi qamtylǵan. Ol eńbek 1999 jyly jazylǵan bolatyn. Atalmysh kitabynda Prezıdent túrkiniń etnogenezi, ulttyq kody, tarıhı zerde týraly atap ótedi. Al bul maqalada Prezıdent bárin yqshamdap, qazaqtyń mádenıeti men rýhanııatyn jańasha tyń derektermen, ozyq tásildermen zerdeleý týraly óziniń júıeli  kózqarasyn bildirip jatyr. Maqalanyń mánisi - el tarıhy men mádenıetin, ónerin zertteýdiń, tanyp-bilýdiń zamanýı ádis-tásilderin usynyp otyrǵandyǵynda», - deıdi Aqedil Toıshanuly.

Folklortanýshy ǵalym atap ótkendeı, jalpy, bizdiń úlken tarıhymyzdy Elbasy ýaqyt pen keńistik aıasynda tutastyqta tujyrymdap tekserip otyr.

«Biz halyq retinde baǵzy ǵasyrlardan beri kele jatyrmyz da, keńistik retindegi qazaqtyń Uly dalasynda ómirimiz jalǵasyp keldi. Biz osy dalanyń tólderimiz. Bizdiń basqaǵa uqsamaıtyndyǵymyz da, ereksheligimiz ben artyqshylyǵymyz da osy Uly dalamen, onyń dáýirler men zamanalar kelbetinde tolǵatyp týdyrǵan  ata dástúrmen baılanysty. Bizdiń mádenıet osy Uly dalanyń jomart ári qatal tabıǵatyna baılanysty qalyptasqan. Altaıdan Atyraýǵa deıin, Ertisten Edilge deıingi alyp aýmaqta baǵzy zamannan tabany taımaı, ar-namysy alasarmaı birtutas halyq ómir súrip keledi. Osy Uly dala halqyn folkor, ortaq tarıh, ańyz-ápsana, shejire syndy rýhanııattyń san taraýy baılanystyryp jatyr», - deıdi folklortanýshy.

Aqedil Toıshanulynyń aıtýynsha, Elbasy tek qazaq halqynyń atynan ǵana emes, kóshpendiler qaýymy halyqtarynyń atynan óz oıyn bildirgen.

«Prezıdent Kóshpendiler órkenıetiniń ókili retinde sóılep otyr. Mysaly, Altaı órkenıeti, Altaı mádenıeti desek, anaý úlken temir qorytý dáýirinen bastap kele jatqan halyqtar ózin Altaıdyń ulanymyz, Altaıdyń tólimiz dep aıtady. Elbasy Uly dala degende sózin sonaý Altaıdan bastaýynyń ózindik máni bar. Qazaqtyń buryn kıgen kıim-keshegi, shalbary, babalarymyzdyń qarý jaraǵyna deıin  - Uly dala halyqtarynyń mádenıetiniń muralary. Elbasy bul jerde bóle-jara emes, tutastyq, birlik, yntymaq turǵysynan sóıledi. Tarıhty aqtarsaq, tutastyqta teksersek mádenıetimizdiń, shyndyǵynda, qaýqarly ekenin anyq sezinýge bolady», - dep túıdi Aqedil Toıshanuly.