Áke-sheshemdi renjitip alýdan qorqamyn - Dımash Qudaıbergen
«Qytaıdaǵy «I am a singer» jobasynyń alǵashqy týrynan keıin kelesi kúni kelesi baǵdarlamaǵa arnap derekti fılm túsirýimiz kerek bolatyn. Uıymdastyrýshylar sál keshigip keletinin habarlady. Men qonaq úıden shyǵyp bara jatqanda birinshi ret kúzetpen júrdim. Adamdar maǵan jaqyndap, umtyla bastady. Qýanyshty edim sol sátte. Ekinshiden, azdaǵan úreı paıda boldy, sebebi jankúıerlerim shyǵarmashylyǵyma jan-tánimen berilgenin shyn sezindim. Óz-ózimdi ustap ary qaraı jyljýym kerek boldy. Sol kezde paıda bolǵan azdaǵan úreı áli de bar. Biraz jyldan keıin meni de umytyp ketedi-aý degennen qoryqpaımyn. Olardy renjitip alam ba degennen jasqanamyn. Ata-anama, dostaryma árdaıym unamdy bolǵym keledi. Áke-sheshemdi renjitip alýdan qorqamyn», - dedi Dımash Qudaıbergen reseılik MÝZ-TV arnasynyń bas dırektory Arman Dáýletııarovqa bergen suhbatynda .
Suhbat barysynda ánshi óziniń ata-anasynyń ómirdegi róli týraly oıymen bólisti.
«Seriktese jumys júrgizetin ártúrli elde ártúrli prodıýserler bar. Biraq eshqaısysy maǵan qaryz emes. Bári de dostyq pen senimge negizdelgen. Ómirdegi basty sheshimderdiń bárin de eresek adam retinde ózim qabyldaımyn. Áıtse de ákemmen kóp aqyldasamyn, sebebi ol aqyldyraq, tájirıbesi molyraq. Ákem men sheshemniń janynda ózimdi jaıly sezinemin. Ómirdegi eń basty baqyt – týǵandaryńnyń janynda bolyp, olardyń mahabbatyn, jylýyn seziný. Ákem men sheshem ómirdegi barym desem de bolady. Ózimdi qalaı ustap, qandaı jaǵdaıǵa da daıyn bolýym kerektigin túsindirgen ata-anammen maqtanamyn», - dedi Dımash Qudaıbergen.