Aqan Sataev «Qazaqfılm» basshylyǵynan ketti

ASTANA. QazAqparat – Tanymal qazaqstandyq rejısser Aqan Sataev Sh.Aımanov atyndaǵy «Qazaqfılm» AQ prezıdenti qyzmetinen ketti. Bul týraly QR Mádenıet jáne sport mınıstri Dáýren Abaev Facebook jelisinde jazdy, dep habarlaıdy QazAqparat tilshisi.

«Qymbatty dostar, osy jazbamda talantty jáne tabysty rejısser Aqan Sataevqa «Qazaqfılm» AQ prezıdenti retinde qajyrly, eń bastysy jemisti eńbegi úshin úlken alǵys bildirgim keledi. Búgin Aqan Qarǵambaıuly aty ańyzǵa aınalǵan kınostýdııanyń basshysy qyzmetinen óz erkimen ketti», - dep jazdy mınıstr.

«Onyń aldaǵy shyǵarmashylyq joly bizdiń kınematografymyzdyń damýyna úles qosatyn serpindi jobalarmen tolyǵatynyna senimdimin», - deıdi Dáýren Abaev.

Eske salaıyq, Aqan Sataev «Qazaqfılm» AQ prezıdenti bolyp 2020 jyly taǵaıyndalǵan edi.

Rejısser 2003 jyly «Sataifilm» stýdııasynyń negizin qalap, 2007 jyly «Reketır» atty alǵashqy tolyqmetrajdy fılmin, «Adasqan» mıstıkalyq trıllerin (2009), «Aǵaıyndy» serıalyn (2009), «Lıkvıdator» psıhologııalyq dramasyn (2011), «Jaýjúrek Myń bala» tarıhı fılmin (2012) túsirdi. Sondaı-aq «Raıony» krımınaldyq dramasy men «Anaǵa aparar jol» tarıhı dramasynyń (2016), «Bıznesmeny» (2018), «Tomırıs» (2019) jəne taǵy basqa týyndylardyń rejısseri.

2014 jyly kınoındýstrııa salasynyń úzdik ókili retinde «Halyq súıiktisi» ulttyq syılyǵyna ıe boldy. 2016 jyly jas rejısserlerdi qoldaýǵa baǵyttalǵan Astana Film Found qorynyń negizin qalaǵan.

Foto: facebook.com