Aqan Rahmetýllın: Aýǵanstanda bul jaqqa kóshkisi kelmeıtin qandastar da bar

NUR-SULTAN. QazAqparat – Aýǵanstandaǵy etnıkalyq qazaqtardyń arasynda Qazaqstanǵa evakýatsııalanýǵa asa yntaly emesteri de bar. QR Syrtqy ister mınıstriniń orynbasary Aqan Rahmetýllın ortalyq kommýnıkatsııalar qyzmetinde ótken brıfıngide osyndaı málimet aıtty, dep habarlaıdy QazAqparat tilshisi.

BAQ ókiliniń Aýǵanstannan kómek suraq jatqan qandastar týraly suraǵyna jaýap bergen SІM ókili ondaǵy etnıkalyq qazaqtar týraly sońǵy statıstıkany keltirdi.

«Memleket basshysy Syrtqy ister mınıstrligine Aýǵanstandaǵy etnıkalyq qazaqtarǵa barlyq kómek túrin kórsetý týraly tapsyrma bergen bolatyn. Bizdiń elshilik jumys júrgizip jatyr. Bizdiń derekter boıynsha Aýǵanstanda shamamen 13 etnıkalyq qazaq otbasy turady. Olar bir jerde shoǵyrlanyp qonystanbaǵan. Negizinen eldiń soltústik provıntsııalarynda shashyrańqy ómir súredi. Elshilik olardyń bárimen únemi baılanys ustap otyr. Aralarynda belsendi ókil bar. Elshilikpen sol baılanysqa shyǵyp júr. Qazir aqparat jınap jatyrmyz. Osy jaqqa baılanysqa shyǵyp, úıden shyǵa almaı otyrǵandaryn aıtqandar bar dep qaldyńyz. Sol adamdardyń baılanys derekterin berseńiz jaqsy bolar edi. Biz ol derekterdi Kabýldaǵy elshilikke bereıik. Solar tikeleı baılanysyp, qajetinshe kómek kórsetsin», - dedi mınıstrdiń orynbasary.

Onyń aıtýyna qaraǵanda, aýǵanstandyq qandastardy kóshirý týraly sheshim shyǵýarý úshin áýeli olardyń sany men kóshýge nıettiler týraly naqty málimet túzilýi kerek.

«Evakýatsııalaý máselesine kelsek, olar eldiń ár túpkirinde shashyrap qonystanǵanymen qatar nıetterin bilý kerek. Qazaqstanǵa kelýge nıetti me, joq pa? Arasynda bul jaqqa qonys aýdarýǵa asa yntaly emesteri de bar degen málimet aldyq. Qazir olar da basqalar sııaqty áliptiń artyn baǵyp otyr. Adamdardyń jetkilikti sany jınaqtalyp, habar jetken boıda tıisti sheshim qabyldanady. Bul másele Memleket basshysynyń baqylaýynda», - dedi Aqan Rahmetýllın.