Akademııalyq adaldyq lıgasynyń bes jyldyǵy: Jetistikter men josparlar

<p>ASTANA. KAZINFORM - Osydan bes jyl buryn joǵary oqý oryndaryndaǵy akademııalyq adaldyq pen etıka qaǵıdattaryn nyǵaıtý maqsatynda, Maqsut Narikbayev University bastamasymen Akademııalyq adaldyq lıgasy (Lıga) qurylǵan bolatyn. Іrgesi qalanǵaly lıga ózin ádil jáne transparentti bilim berý ortasyn qalyptastyratyn, etıkalyq standarttardy ilgeriletetin ınstıtýt retinde tanytty. Lıganyń qyzmetinen onyń barynsha adal jáne ashyq akademııalyq alań qurýǵa degen umtylysyn baıqaýǵa bolady.&nbsp;</p>

Bes jyl ishinde lıga 18 ýnıversıtettiń basyn qosyp, tájirıbe almasýǵa, netvorkıngti damytýǵa jáne birlesken jobalardy júzege asyrýǵa múmkindik beretin mańyzdy alańǵa aınaldy. Lıganyń negizgi jetistikterine standarttar men akademııalyq qyzmettiń ártúrli baǵyttary boıynsha nusqaýlyqtardy ázirleý, monıtorıngter men aýdıtter júrgizý, oqytý materıaldary (vıdeodárister toptamalary) men tsıfrlyq platformalardy daıarlaý jáne onyń Halyqaralyq akademııalyq adaldyq ortalyǵy (ICAI) sııaqty halyqaralyq uıymdardaǵy belsendiligi kiredi. 

Dál osy kezeńde Lıga Jubanov atyndaǵy Aqtóbe óńirlik ýnıversıtetimen birlese otyryp, kelesi jylǵa arnalǵan strategııalyq jospardy ázirleýde. Bul jospar aıasynda mynadaı qadamdar iske aspaq: akademııalyq adaldyq boıynsha halyqaralyq konferentsııalar men semınarlar ótkizý, AIRS 2.0 standartyn (ICAI) engizý, jańa tsıfrlyq platformalardy daıarlaý, akademııalyq etıka boıynsha dóńgelek ústelder men pikirtalastar júrgizý, qoldanystaǵy tájirıbelerdiń monıtorıngi jáne t.b.

Foto: Kazinform

Maqsut Narikbayev University modeli boıynsha Astana medıtsına ýnıversıteti jáne Qaraǵandy medıtsına ýnıversıteti ózderiniń «Akademııalyq adaldyq dashbordy» jónindegi tájirıbesimen bólisýge daıyn. Power BI negizindegi bul qural ártúrli ónimdilik kórsetkishteri men akademııalyq adaldyq boıynsha esepterdi tıimdi baqylaýǵa jáne taldaýǵa múmkindik beredi. Dashbord kómegimen akademııalyq adaldyq deńgeıin baqylaýǵa jáne ony arttyrý joldaryn oılastyrýǵa kómektesetin vızýaldy esepterdi (grafıkter, dıagrammalar, baǵalardy bólý qısyǵy) daıyndaýǵa bolady. 

Akademııalyq adaldyq lıgasynyń jobalyq keńsesiniń basshysy Mahanbaeva Nurgúldiń pikirinshe, mundaǵy basty jetistik – Lıganyń halyqaralyq deńgeıde moıyndalǵan seriktes atanýy.

«Bizdiń basty nátıjemiz – Lıganyń shtab-páteri AQSh-ta ornalasqan Halyqaralyq akademııalyq adaldyq ortalyǵyna qosylýy. Búginde Halyqaralyq akademııalyq adaldyq ortalyǵyna álemniń túkpir-túkpirinen 200-den astam ýnıversıtet múshelik etedi, al bizdiń lıga Qazaqstan boıynsha bul Ortalyqqa múshe jalǵyz uıym. Sonymen qatar Maqsut Narikbayev University-diń ózi de Halyqaralyq akademııalyq adaldyq ortalyǵyna múshe-ýnıversıtet», – dep bólisti Nurgúl hanym.

Akademııalyq adaldyq lıgasyna qyzyǵýshylyq úzdiksiz artyp keledi jáne qazirdiń ózinde 10-nan astam ýnıversıtet oǵan qosylýǵa nıet bildirip otyr. Lıgaǵa kirgisi keletin oqý oryndary barlyq qajet aqparat pen qoldaý kórsetetin Jobalyq keńsege júgine alady. Qazirgi ýaqytta elimizdegi akademııalyq adaldyqty kúsheıtýmen belsendi aınalysatyn eki negizgi memlekettik uıym – Ǵylym jáne joǵary bilim mınıstrligi men Sybaılas jemqorlyqqa qarsy is-qımyl agenttigi.

Akademııalyq adaldyq lıgasyna múshelik kelesideı múmkindikterdi usynady: joǵary oqý oryndary qyzmetiniń ozyq standarttaryna qol jetkizý, birlesken jobalardy júzege asyrý, bilim berý salasynyń jahandyq kóshbasshylarymen tájirıbe almasý jáne halyqaralyq bastamalarǵa atsalysý. Lıga Qazaqstannyń jáne basqa da elderdiń barlyq joǵary oqý oryndaryn akademııalyq adaldyq mádenıetin damytýǵa, joǵary bilim berý standarttaryna umtylýǵa jáne bilim berý protsesteriniń sapasyn arttyrýǵa shaqyrady.