Akademık Mustafa Mataevqa 90 jyl: halyqaralyq ǵylymı-tájirıbelik konferentsııa ótti

QYZYLORDA. QazAqparat – Qorqyt ata atyndaǵy Qyzylorda ýnıversıtetinde fılosofııa ǵylymdarynyń kandıdaty, professor Mustafa Mataevtyń 90 jyldyǵyna arnalǵan «Transformatsııa kezeńindegi qazaqstandyq qoǵamnyń damýynyń gýmanıtarlyq aspektileri» atty halyqaralyq (oflaın-onlaın formatta) ǵylymı-tájirıbelik konferentsııa ótti, dep habarlaıdy QazAqparat.

Jıynda bilim berý júıesin damytý, aımaqtyq jastar saıasaty, qazaq fılosofııasy, qazaq zııalylarynyń ulttyq sana-sezimdi qalyptastyrýdaǵy róli týraly baıandamalar jasaldy.

Konferentsııada Qyzylorda oblystyq máslıhatynyń tóraǵasy, tarıh ǵylymdarynyń kandıdaty Naýryzbaı Baıqadamov ǵalymnyń bilim men ǵylym júıesin damytýǵa qosqan úlesine toqtaldy.

Al, Qorqyt ata atyndaǵy Qyzylorda ýnıversıtetiniń basqarma tóraǵasy -rektory, fılologııa ǵylymdarynyń kandıdaty Beıbitkúl Kárimova ǵalymnyń ómir jáne eńbek joly búgingi jastarǵa naǵyz úlgi-ónege ekenin atap aıtty.

Mustafa Mataev 1969-1980 jyldary N. Gogol atyndaǵy Pedagogıka ınstıtýtynyń (qazirgi Qorqyt ata atyndaǵy Qyzylorda ýnıversıteti) marksıstik-lenındik fılosofııa kafedrasynyń meńgerýshisi, 1980-1992 jyldary fılologııa fakýltetiniń dekany, 1992-2002 jyldary «Quqyqtaný», keıinnen «Memleket jáne quqyq teorııasy men tarıhy» kafedrasynyń meńgerýshisi qyzmetterin atqardy. 2002 jyldan ómiriniń sońyna deıin osy kafedranyń kurmetti meńgerýshisi, kafedra professory bolyp eńbek etti. Bilim berý, ǵylymı jáne qoǵamdyq qyzmetinde kóptegen medalǵa, belgilerge alǵystar men ataqtarǵa ıe bolǵan. Ǵylymı zertteý jáne oqý-ádistemelik jumystarynyń nátıjesinde 55 ǵylymı eńbektiń avtory atandy.

Ǵalymnyń usynysymen bilikti jastar Máskeýge, Sankt-Peterbýrgke, Almatyǵa, Astanaǵa zań mamandyǵy boıynsha aspırantýraǵa, tájirıbe almasýǵa jiberilgen. Osynyń nátıjesinde ýnıversıtettegi zań ǵylymdary kandıdattarynyń sany onnan asty.

Búginde ýnıversıtette zańger kadrlar daıarlaıtyn arnaıy kafedra, bilimdi, tájirıbeli zańgerler men ǵalymdar eńbek etip, ustazynyń ustanymyn ári qaraı jalǵastyryp keledi.

Mustafa Mataıuly kezinde negizin qalaǵan Krımınalıstıka laboratorııasy aýqymdy jobalardy qolǵa aldy. Stýdentterdiń «Zań klınıkasy» turǵyndarǵa sapaly quqyqtyq qyzmet kórsetýmen júıeli aınalyssa, «Jas zańger» úıirmesi de naqty zertteý jumystaryn júrgizip otyr.

Jıynǵa otandyq jáne sheteldik ǵalymdar, Mustafa Mataıulynyń jary Torǵyn Aımuratova, ul-qyzdary, baýyrlary, shákirtteri, Qorqyt ata atyndaǵy Qyzylorda ýnıversıtetiniń ǵalymdary, professor-oqytýshylar quramy, bilim alýshylary, BAQ ókilderi onlaın jáne oflaın formatta qatysty.

Konferentsııaǵa qatysýshylar ýnıversıtettiń №1 ǵımaratynda ornalasqan M. Mataev atyndaǵy dárishanamen tanysty. Ǵalymnyń urpaqtary M. Mataevtyń jeke qoryndaǵy kitaptardy ýnıversıtettiń ǵylymı kitaphanasyna tabystady.