Akademık Elbasynyń túrki jastarynyń basyn qosýǵa qalaı kúsh salǵanyn aıtyp berdi
«Qazaqstandy - túrki dúnıesi atajurt dep esepteıdi. Onyń sebebi - kóptegen ǵasyrlar boıy birinshi Túrik qaǵanaty, ekinshi Túrik qaǵanaty, odan keıin Altyn Orda, odan soń Aq Orda - bári túrki dúnıesiniń memleketteri bolyp esepteledi. Sol qurylǵan memleketterdiń negizin quraıtyn rý-taıpalar keıin Qazaqııa degen memleketti qurdy. Bizdiń Qazaqstannyń birinshi memleket qurǵan jylynan beri 553 jyl ótti. Bizdiń Elbasymyz Nursultan Nazarbaevtyń qatysýymen 550 jyldyǵyn atap óttik», - dedi professor Halyqaralyq Túrki akademııasy (TWESCO) uıymdastyrǵan «Uly Dala» ІІІ Gýmanıtarlyq ǵylymdar forýmynda.
Murat Jurynovtyń aıtýynsha, túrki birligi - Prezıdent Nursultan Nazarbaevtyń barlyq ýaqytta birinshi kezektegi máselesi bolyp qaraldy.
«1991 jyly Qazaqstan óziniń Táýelsizdigin alysymen Nursultan Nazarbaevtyń Jarlyǵymen Túrkistan qalasyn ary qaraı damytý, jandandyrý úshin sol jerde A.ıAssaýı atyndaǵy Túrkistan memlekettik ýnıversıteti ashyldy. Úsh jyldan keıin biz Túrkııa memleketiniń kelisimimen ol ýnıversıtetti Qoja Ahmet ıAssaýı atyndaǵy Halyqaralyq qazaq-túrik ýnıversıteti etip qaıta qurdyq. Men sol ýnıversıtettiń birinshi rektory boldym. Sarapshylardyń boljamy boıynsha dúnıede 240 mıllıonnan astam túrki bar. Osylardyń basyn qosý úshin árbir memleketke - qazaq-túrik ýnıversıtetine kvota berdik. Saha Respýblıkasy, Tatarstan, Chývash, Altaı, Ózbekstan, Qyrǵyzstan, Túrikmenstan, Ázerbaıjan, Túrkııadan stýdentter keldi. Ondaǵy maqsatymyz - bizdiń Elbasymyzdyń usynysymen túrki dúnıesiniń basyn qosý boldy. Sondyqtan, keleshekte túrki halyqtarynyń basy qosylady. Eń negizgi maqsat - osy», - deıdi Murat Jurynov.
Professor óz sózinde bul zamandy Atatúriktiń de armandap ótkenin tilge tıek etti.
«Túrkııada Qazaqstannan myńdaǵan stýdentter oqıdy. Bilim salasyn qamtý kerek. Barlyq ǵylymdar salasyn da qamtý qajet. Jaqynda biz eki jyl buryn Túrki dúnıesiniń ulttyq ǵylym akademııalarynyń odaǵyn qurdyq. Onyń birinshi prezıdenti bolyp men saılandym. Prezıdenttik jyl saıyn aýysyp turady. Bul bizdiń birigip jumys isteýimizge, osy qurylǵan odaqtyń uzaq merzimde jumys isteýine septigin tıgizedi», - dedi Murat Jurynov.