«Aq jol» partııasy saılaýaldy baǵdarlamasyn bekitýdi keıinge qaldyrdy
«Biz pragmatıkalyq partııa retinde sybaılas jemqorlyq, baılar men kedeıler arasyndaǵy alshaqtyq, ekonomıka men saıasattaǵy monopolııadan bastalatyn eski olqylyqtardyń qoǵamnyń barlyq salasyn dendep alǵanyn kórip otyrmyz. Olar ózdiginen joıylmaıdy. Muny eńserý turaqty kúsh-jigerdi talap etedi. Sondyqtan «Aq jol» partııasynyń saıası baǵdarlamasy erekshe ózekti», - dedi «Aq jol» demokratııalyq partııasynyń tóraǵasy Azat Perýashev.
Osy oraıda ol Alash respýblıkasynyń kóshbasshysy Álıhan Bókeıhannyń «Memlekettigi joq halyq - jetim halyq» degen sózin mysalǵa keltirdi.
«Qazaq respýblıkasynyń táýelsizdigin qamtamasyz etý jáne ulttyq múddeni qorǵaý ár azamattyń qasıetti mindeti. Táýelsizdik degen - elimiz, jerimiz jáne onyń baılyǵy, memlekettik til men qoǵam birligi. Táýelsizdik degen - óz jolyńdy, taǵdyryńdy tańda múmkindigi. Bul - urpaqtarymyzdyń bolashaǵy úshin jaýapkershilik. Táýelsizdiktiń bastaýynda qazaq halqynyń erkindigi men eldiginiń negizinde Alash ulttyq ıdeıasy jatyr. Qazaq eli úshin Alashtan artyq ıdeıa joq», - dedi ol.
Quryltaı barysynda elimizdiń barlyq óńirlerinen kelgen delegattar partııa basshysy jarııa etken saılaýaldy saıası baǵdarlamaǵa engizilýi tıis birqatar usynys jasady.
Osydan keıin baǵdarlamaǵa eniziletin túzetýlerdi qarastyratyn komıssııa qurylyp, músheleri bekitildi.
«Osy komıssııa daıyndaǵan jobany tolyqtyryp, quryltaıymyzdyń atynan qarastyrýdy jáne qabyldaýdy Ulttyq keńesimizge tapsyraıyq degen usynys bar», - dedi Azat Perýashev.
Quryltaı delegattary mundaı usynyspen tolyqtaı kelisti.