«Aq jol» partııasy Oralda qaıyrymdylyq sharasyn ótkizdi

ORAL. QazAqparat – «Aq jol» demokratııalyq partııasy Oral qalasynda qaıyrymdylyq sharasyn ótkizdi, dep habarlaıdy QazAqparat tilshisi.

«Aq jol» partııasy BQO fılıaly tóraǵasynyń orynbasary Rada Haırýshevanyń málim etkenindeı, shara barysynda «Shańyraq» jasóspirimder úıinde tárbıelenip jatqan balalarǵa mektep qural-jabdyqtary tabys etildi.

Basqosýǵa qatysqan qalalyq máslıhat depýtaty, «Aq jol» partııasy oblystyq keńesiniń múshesi Valerıı Vlasov shákirtterdi jańa oqý jylynyń bastalýymen quttyqtap, olardyń saýaldaryna jaýap berdi.

Jalpy, V.Vlasov jıyrma jyldaı ýaqyttan beri «Shańyraq» jasóspirimder úıin nazardan tys qaldyrmaı, onyń ǵımaratyn jóndeýge, basqa da jumystarǵa óz úlesin qosyp keledi.

Buryn «Shańyraq» jasóspirimder úıine basshylyq jasaǵan QR bilim berý isiniń qurmetti qyzmetkeri Qanat Qyryqbaev «Aq jol» partııasynyń osynaý mekemege qıyn kezde de qolushyn sozyp, turaqty qamqorlyq jasap kele jatqanyn jetkizdi.

«Shańyraq» jasóspirimder úıiniń basshysy Ómirbaı Qalymbetov balalar úılerinde jıi kezdesetin tolǵaqty máselelerdi ortaǵa saldy.

«Biz kezdesýde talqylanǵan máselelerdi sheshý joldaryn qarastyramyz. «Aq jol» partııasynyń osy baǵyttaǵy qyzmeti aldaǵy ýaqytta da jalǵasatyn bolady», dedi QazAqparat tilshisine Rada Haırýsheva.