«Aq jol» partııasy fraktsııalar usynystary boıynsha parlamenttik komıssııa qurýdy usyndy

  ASTANA. QazAqparat - Májilistegi «Aq jol» partııasynyń fraktsııasy konstıtýtsııalyq reforma boıynsha túsip jatqan usynystardy jan-jaqty talqylaý úshin Parlament palatalarynyń komıssııasyn qurýdy usyndy, dep habarlaıdy QazAqparat.

Parlament palatalarynyń birlesken otyrysynda depýtat Azat Perýashev Prezıdent Nursultan Nazarbaevtyń bılik tarmaqtary arasynda ókilettikti qaıta bólý bastamasy keńinen pikirsaıystar júrgizýge negiz bolǵanyn, osy oraıda myńdaǵan azamattarǵa ózderiniń pikirlerin jarııalaýǵa yqpal etkenin atap ótti. 

«Bul rette teńdestirilgen qadamdy qamtamasyz etý kerek, ıaǵnı elge ekonomıkany damytýda, azamattardyń ál-aýqatyn arttyrýda, qoǵam aldynda ashyqtyq pen eseptilikti qamtamasyz etýde birlesken nátıjeni maqsat etken bastamashy úkimet pen parlament kerek. Parlamenttik fraktsııalardan, komıtetterden jáne búgin sóz sóılegenderden kelip túsip jatqan usynystardy egjeı-tegjeıli qarastyrý úshin Májilis pen Senattan depýtattardyń teńdeı sanymen,  sondaı-aq ázirleýshiniń ókilderimen Parlament palatalarynyń birlesken komıssııasyn qurýdy usynamyn. Komıssııa óz kezeginde ekinshi oqylymǵa zań jobasyn pysyqtaýy tıis», - dedi Perýashev.

Aıta keteıik, palatalardyń birlesken otyrysy barysynda «Qazaqstan Respýblıkasy Konstıtýtsııasyna ózgerister men tolyqtyrýlar engizý týraly» QR Zańynyń jobasy birinshi oqylymda talqylanýda.