«Aq jol» partııasy Ashat Aımaǵambetovke «shabýylyn» túsindirdi
«Danııa Espaevanyń depýtattyq saýaly qoǵamda kóp talqylandy. Kóbisi bul «Ashat Aımaǵambetovke jasalǵan shabýyl»dep aıtyp jatyr. Osyǵan baılanysty partııa músheleri ne aıtar eken?» - dep suraq qoıdy búgin Ortalyq kommýnıkatsııalar qyzmetinde ótken baspasóz máslıhatynda tilshilerdiń biri partııa múshelerine.
Bul suraqqa jaýap bergen Berik Dúısembınov «bul – Ashat Aımaǵambetovke jeke azamat retinde emes, mınıstr retinde qoıylǵan suraq» ekenin jetkizdi.
«Ashat Aımaǵambetovti búgingi tańdaǵy qazaqtildi ultjandy azamattardyń biri dep asa qurmetpen qaraımyz. Ol azamat mınıstrdiń orynbasary bolǵan kezde talaı suraqtarymyzǵa tikeleı jaýap bergen. Qarym-qatynasymyz óte jaqsy. Sondyqtan áleýmettik jelige tarap ketken «shabýyl» degen áńgime múlde teris ekenin aıtqym keledi», - dedi ol.
Berik Dúısembınov «Aq jol» partııasy Bilim jáne ǵylym mınıstrliginen daýlap otyrǵan qarajatqa qatysty aıta kele ol aqsha túsken kezde Ashat Aımaǵambetovtiń mınıstr bolmaǵanyn aıtyp ótti.
«Sondyqtan bul Ashat Aımaǵambetovtiń jeke basyna emes, mınıstrlikke qoıylǵan suraq ekeni eskerilse deımiz», - dedi ol.
Eske sala ketsek, buǵan deıin Parlament Májilisiniń jalpy otyrysynda «Aq jol» fraktsııasynyń depýtaty Danııa Espaeva bilim berý salasyndaǵy ózekti máselelerge qatysty Úkimet basshysy Asqar Mamınniń atyna depýtattyq saýal joldaǵan bolatyn.
D. Espaeva 29 shildede Bilim jáne ǵylym mınıstri Ashat Aımaǵambetovtiń atyna tıisti hat joldanǵanyn, onda 67 mln dollar kólemindegi halyqaralyq zaımǵa qatysty saýaldar qoıylǵanyn atap ótti. Sondaı-aq 2016 jyldan bastap (27,2 mlrd teńge) mektepter úshin jergilikti bilim basqarmalaryna bólingen qarjynyń ıgerilýine baılanysty suraqtar baǵyttalǵan. Onyń aıtýynsha, zańnama aıasynda memlekettik organ sýaldarǵa bir aı ishinde jaýap berýi tıis. Alaıda áli kúnge deıin vedomstvodan jaýap kelmegen.