«Aq jol» partııasy ulttyq keńesiniń plenýmy Qazaqstanda AES salý máselesin talqylady

<p>ASTANA. KAZINFORM - Prezıdent Qasym-Jomart Toqaevtyń keshegi Joldaýynda jarııalanǵan jalpyhalyqtyq referendýmǵa shyǵarylyp otyrǵan másele boıynsha partııanyń resmı ustanymyn ázirleýge arnalǵan &laquo;Aq jol&raquo; demokratııalyq partııasy ulttyq keńesiniń plenýmy ótti.</p>

Plenýmda energetıka mınıstri Almasadam Sátqalıevtiń ınvestıtsııalyq jobalardyń júzege asýyn tejeıtin, elektroenergııa tapshylyǵynyń bar ekendigi (8 GVt), atom energetıkasyn damytýdyń bolashaǵy, AES qurylysynyń nusqalary jáne t. b. týraly baıandamasy tyńdaldy.

Otandyq bıznes pen ónerkásip ókilderiniń múddesin qorǵaıtyn «Aq jol» dempartııasy úshin qazirgi tańda óńdeýshi kásiporyndardy energııamen qamtamasyz etý máselesi eń jaqyn ári ózekti máseleniń biri bolyp otyr.

A.Satqalıev pen onyń áriptesteri — Energetıka vıtse-mınıstri Suńǵat Esimhanov «Qazaqstan atom stantsııalary» JShS bas dırektory Tımýr Jantıkın jáne basqalar Ulttyq keńes músheleriniń kóptegen suraǵyna jaýap berdi.

Májilistiń vıtse-spıkeri Danııa Espaeva, Májilis depýtattary Qazybek Isa, Erlan Barlybaev, Qarýly Kúshter ardagerleri keńesiniń tóraǵasy Kópesbaı Jampeıisov, partııa tóraǵasynyń orynbasary Serik Erýbaev, Ulttyq keńes hatshysy Berik Dúısembınov jáne basqa da birqatar áriptester ózekti suraqtar qoıdy, sonyń ishinde yqtımal balama sheshimderge jáne AES qurylysyna yqtımal merdigerdi tańdaýǵa baılanysty.

Úsh saǵatqa sozylǵan talqylaýdyń qorytyndysy boıynsha pleným atom energetıkasyn damytý men AES salýdy qoldap, salany progressıvti túrde damytý qajettigin jáne órkenıetti álemnen tehnologııalyq turǵyda artta qalýǵa jol bermeý kerektigin atap ótti.

Sonymen birge, talqylaý barysynda jáne baıandamashylarǵa aıtylǵan pikirler de osy saladaǵy qaýipsizdikti qamtamasyz etýge erekshe kóńil bóldi.