Aq Jaıyq jurtshylyǵy Denıs Tendi eske aldy
Búgin Denıs Tendi qadir tutatyn barlyq sportshylar, Aq Jaıyq jurtshylyǵy qaladaǵy jabyq muz aıdyny saraıyna jınalyp, gúl shoqtaryn qoıdy. Qaraly jıyn ótkizip, ataqty mánerlep syrǵanaýshyny eske aldy.
«Bul - barsha Qazaq eli úshin úlken qaıǵy. Denıs Ten sporttyq jolynda úlken tabystarǵa qol jetkizýmen birge adamgershiligi mol, elge, qoǵamǵa paıdasyn tıgizip júrgen zamandastarymyzdyń biri edi. Estigende, qatty qınaldyq. Sportshy bolǵandyqtan, kezdesip, kóz aldyńda júrgen aıaýly jandy qalaı ólimge qııarsyń. Budan úsh jyl buryn, 2015 jylǵy 5 sáýirde Elbasynyń qatysýymen Oralda ótken «Jastar qýatty Qazaqstan úshin!» respýblıkalyq forýmyna Denıs Ten de kelgen bolatyn. Sol kezde birge bolyp edik. Arada úsh jyl ótkende dańqty sportshynyń ómiri bulaısha kilt úziledi dep kim oılaǵan. Biz, Aq Jaıyq sportshylary Denıs Tenniń otbasyna, týma-týysqandaryna, barsha jankúıerlerine qaıǵyryp, kóńil aıtamyz. Denıs Tendi biz esh ýaqytta umytpaımyz», dedi jıynǵa qatysqan sambodan tórt dúrkin álem chempıony, álem kýbogynyń ıegeri, Qazaqstannyń eńbek sińirgen sport sheberi Erbolat Baıbatyrov.
Aıta keteıik, ataqty mánerlep syrǵanaýshynyń atasy qazirgi M.Ótemisov atyndaǵy Batys Qazaqstan memlekettik ýnıversıtetinde (burynǵy Oral pedagogıkalyq ınstıtýty) oqyǵany budan úsh jyl buryn sol forýmǵa kelgen kezinde belgili bolǵan edi.
Bul týraly Denıs Tenniń ózi Instragamdaǵy paraqshasynda bylaı dep jazdy da: «Álem chempıonaty Shanhaıda bolyp jatqan kezde maǵan elden habarlasyp, Oralda ótetin forýmǵa shaqyrdy. Meniń Oralǵa baratynymdy bilgen ájem otbasy shejiresinen qyzyqty derektiń betin ashty. Sóıtsem, atam Oraldaǵy ataqty M.Ótemisov atyndaǵy Batys Qazaqstan memlekettik ýnıversıtetin bitirgen eken. Atamdy ózim kórgen joqpyn. Biraq biletinderdiń aıtýynsha, men oǵan óte uqsas ekenmin. Syrtqy túrim de, qımyl-qozǵalys, oıymdy jetkizýim de, tipti qoltańbam da atama keledi eken. Elbasymen kezdesý árqashan shabyttandyrady. Sonymen birge ýnıversıtette bolýym da erekshe áser qaldyrdy. Atam júrgen jerlerde, ol oqyǵan dárishanada bolý qandaı baqyt! Maǵan onyń osynda oqyǵany jónindegi qujattardy, anyqtama, jeke qaǵazdaryn kórsetti. Naǵyz tarıhı derekter. Oraldyqtarǵa meni osylaısha qonaqjaılylyqpen qarsy alyp, jylylyq syılaǵany úshin alǵysymdy aıtyp, qalanyń odan ári jaınap, gúldene berýin tileımin».
«Elbasynyń qatysýymen ótetin mundaı jıyndardyń biz sekildi jastardy otansúıgishtikke tárbıeleýde mańyzy zor. Ult kóshbasshysynyń qajyrly eńbegi arqasynda Qazaqstan jıyrma jyldan asatyn ýaqyt ishinde barlyq salada asa úlken tabystarǵa qol jetkizdi. Sonyń ishinde sport salasy, ásirese, ózim aınalysatyn mánerlep syrǵanaýdyń qaryshty damyǵanyn jaqsy bilemin. Qazaqstandyq sportshylardyń jetken bıikteri az emes. Ózim Oralǵa Qytaıdaǵy álem chempıonatynan qola júldemen keldim. Elbasy bizge senedi, sondyqtan aldaǵy ýaqytta da olja salarymyz anyq», dep edi sonda 2013 jylǵy álem chempıonatynyń kúmis júldegeri, 2014 jylǵy Sochı Olımpıadasy men 2015 jylǵy dúnıejúzilik dodanyń qola medal ıegeri Denıs Ten.
Osylaısha atasynyń izi qalǵan Oralda bolǵan Denıs Ten Aq Jaıyqtan úlken ásermen ketip edi.