Aq Jaıyq tarıhyna baılanysty jańa kitap jaryq kórdi
Kitaptyń tanystyrylymynda aýdan ákimi Ádil Jolamanov bul jınaqtyń óńir shejiresine qosylǵan úles ekendigin, zertteý jumystarynyń aldaǵy ýaqytta da jalǵasatynyn atap ótti.
Aýdandyq «Jaıyq tańy» gazetiniń bas redaktory, QR aqparat salasynyń úzdigi Bolat Esqalıevtiń aıtýynsha, «Іlbishin», «Іlbishin ýezi» ataýlary ertedegi ákimshilik-aýmaqtyq bólinisterden jaqsy málim. 1939 jylǵa deıin aýdan ortalyǵy Іlbishin (keıin Chapaev) ataldy. Aýdan ákimi Á.Jolamanovtyń «Tarıhymyzdy túgendeý - perzenttik paryz» degen arnaýymen ashylǵan basylym «Jaıyqtyń ejelgi kóshpendileri», «Túrkiler, pechenegter, oǵyzdar», «Pýgachev búligi», «HІH ǵasyr», «HH ǵasyrdyń alǵashqy onjyldyǵy», «1916 jyl», t.b., ıaǵnı 26 taraýdan turady. Jaıyq boıyn óz zamanynda tereń zerttegen oqymysty-ǵalymdardyń eńbekteri negizge alynýmen birge tájirıbesi baı ólketanýshy-jýrnalıst Baqtyǵalı Qospaevtyń ortalyq muraǵattarǵa deıin baryp, kóz maıyn túgeskenin aıtý kerek. Mysaly, azamat soǵysy kezindegi Býdarın, Іlbishin oırandary tyń derek-dáıektermen berilip otyr. Burynǵy kitaptarda jarııalanǵan saıası qýǵyn-súrgin qurbandarynyń qaraly tiziminiń tolyqtyrylýy da halyq zerdesiniń qalǵymaıtynyna bir dálel ekeni anyq. Jınaqqa sondaı-aq Chapaev aýylyndaǵy №1 orta mektep muǵalimi Aınat Ánesova da súbeli eńbek sińirgen.
Budan buryn aýdan tarıhyna qatysty entsıklopedııalyq úlgidegi 7 jınaq jaryq kórgen. Іs munymen toqtalmaı, 1997 jyly Chapaev pen Taıpaq aýdandary qosylyp, irilendirilgen óńirdiń ótkenin indete ekshep, zertteý odan ári jalǵasqan-dy. Osynyń nátıjesinde 2014 jyly «Aqjaıyq aýdany» serııasymen Taıpaq atyrabynyń shejire-baıany tasqa basylǵan bolatyn.