Aq úı abaısyzda arnaıy qupııa jasaǵynyń sýretin jarııalap qoıǵan

<p>Aq úı HAMAS uıymy kepilge alǵan adamdardy bosatýǵa qatysqan arnaıy jasaqtyń qupııasyn abaısyzda ashyp qoıǵan. Kazinfom agenttigi bul týraly New York Post basylymyna silteme jasap habarlaıdy.&nbsp;</p>

Baıden ákimshiligi beısenbi kúni Izraılge HAMAS sodyrlary kepilge alǵan adamdardy tabýǵa jáne qutqarýǵa kómektesken AQSh-tyń “Delta” jasaǵynyń birneshe tulǵasynyń jeke basyn kezdeısoq ashqanyn moıyndady. 

Aq úı óziniń Instagram-daǵy resmı akkaýntynda prezıdent Djo Baıden armııanyń lańkestikke qarsy elıtaly “Delta” bólimshesiniń múshesimen qol alysyp turǵan sýretin jarııalady. 

Baıden amandasyp turǵan sarbazdan basqa fotoda “Deltanyń” taǵy úsh sarbazynyń júzi kórinip tur. 

Sheneýnikter qatelikterin túsingenshe, fotosýret Aq úıdiń akkaýntynda bir saǵattaı ýaqyt jarııalanyp turǵan.

“Ony baıqaǵan boıda, biz fotosýretti birden alyp tastadyq”, - dedi AQSh prezıdenti ákimshiliginiń ókili.

Beısenbide áleýmettik jelilerde taraǵan skrınshotqa sáıkes, foto joıylǵanǵa deıin 6100-den astam lúpil jınaǵan.

«Delta» jaýyngerleriniń jeke basy men aty-jóni jaý qolyna tutqynǵa túsken jaǵdaıda olardy anyqtaýyna jol bermeý úshin qupııa saqtalady. Jasaq músheleriniń sýretteri sırek kezdesedi jáne olardyń betteri eshqashan kórinbeıdi.

Ótken aptada Baıden ızraıldik áriptesterine 7 qazanda Izraılge jasalǵan shabýyl kezinde HAMAS sodyrlary tutqynǵa alǵan adamdardy bosatýǵa kómektesý úshin Izraılge “Delta” komandasyn joldady.