«Aq bulaq» baǵdarlamasynyń tarıfteri aqylǵa qonymdy bolýy kerek - sarapshy

ASTANA. QazAqparat - «Angel» Qoǵamdyq birlestigi 2015 jyly Qazaqstannyń bes oblysynda, atap aıtqanda, Aqmola, Almaty, Aqtóbe, Atyraý jáne Jambyl oblystarynda «Aqbulaq» memlekettik baǵdarlamasyna júrgizilgen qoǵamdyq monıtorıng nátıjelerin búgin elordalyq BAQ ókilderine tanystyrdy. «Aq bulaq» baǵdarlamasynyń oryndalý barysyna Aqtóbe oblysy boıynsha qoǵamdyq monıtorıng júrgizý isiniń aımaqtyq úılestirýshisi Marına Tsygankova baǵdarlamany iske qosarda, tarıf aqylǵa qonymdy bolýy kerek deıdi.

«Joba (qoǵamdyq monıtorıng júrgizý jobasy - agenttik) eldi mekenderdegi sý qubyrlaryn salý jáne qaıta qurastyrý qyzmetteriniń sapasyn jaqsartýǵa, qoǵamdyq monıtorıng tetikterin jolǵa qoıýǵa, qoǵamdyq baǵalaý mádenıetin damytýǵa, memlekettik baǵdarlamalar men jobalardy júzege asyrý kezindegi sybaılas jemqorlyq oqıǵalaryn aldyn alýǵa, sarapshylardyń áleýetin nyǵaıtýǵa jáne Qazaqstannyń basqa óńirlerinde qoǵamdyq baqylaý júrgizýdiń alǵysharttaryn jasaýǵa baǵyttalǵan. Qoǵamdyq pikirdiń mańyzyna toqtalsam, mysaly, Aqtóbe oblysynda tarıf máselesi ózekti boldy. Tarıf - halyqty alańdatatyn tetikterdiń biri. Meniń oıymsha, tek bizdiń oblys qana ortalyqtandyrylǵan sý qubyryna qosý úshin halyqtan 30 myń teńge aqsha jınaǵan shyǵar. Shyn máninde, árbir úıge sý qubyry tartylyp qoıǵan edi, ıaǵnı, krandy ashý úshin ǵana árbir otbasydan 30 myń teńge jınaǵan. Árıne, biraz adam bul aqshany tólegen, biraq, sý kranyn iske qostyrý úshin talaı kabınettiń tabaldyryǵyn tozdyrǵan. Al, oblysymyzdyń basqa bir aýylynda 30 myń teńge jınaǵan kezde, halyq narazylyq bildire bastaǵan. Aqyr sońynda, tarıf 17 teńgege, qazir 4 myń 200 teńgege tústi. Mine, qoǵamdyq pikir osyndaı kúshke ııa. Monıtorıng júrgizýdegi negizgi maqsatymyzdyń biri - mine, baǵdarlamanyń zań aıasynda durys oryndalýyn tekserý»,-deıdi M. Tsygankova.

Onyń aıtýynsha, merdigerler men halyq arasynda baılanys ornatyp, merdigerdiń jumysy halyq aldynda jarııaly túrde júrgizilýi kerek. «Eń bastysy, baǵdarlamanyń tarıfteri aqylǵa qonymdy bolýy kerek»,-dep atap ótti ol.

Esterińizge sala keteıik, 2011-2020 jyldarǵa arnalǵan «Aqbulaq» baǵdarlamasynyń maqsaty birinshi kezekte halyqty sapaly aýyzsýmen jáne sý tartý qyzmetterimen qamtamasyz etýdi kózdeıtinin eske salamyz. Baǵdarlamanyń birinshi kezeńi 2011-2015 jyldarǵa arnaldy. 2015 jyldyń qańtarynan bastap «Aqbulaq» «Aımaqtardy damytý» baǵdarlamasyna engizildi. 2011 jyldan bastap «Aqbulaq» baǵdarlamasyn júzege asyrýǵa 335 mıllıardtan asa teńge bólindi.