AITV tasymaldaýshylar qatań medıtsınalyq baqylaýda bolýy kerek – Úkimet basshysy

ASTANA. QazAqparat – Adamnyń ımmýn tapshylyǵy vırýsyn tasymaldaýshylardyń barlyǵy qatań medıtsınalyq baqylaýda bolýy kerek. Bul týraly Úkimet otyrysynda Premer-Mınıstr Álıhan Smaıylov aıtty, dep habarlaıdy QazAqparat tilshisi.

«Adamnyń ımmýn tapshylyǵy vırýsy jahandyq densaýlyq saqtaý júıesiniń asa mańyzdy problemalarynyń biri bolyp qalýda. Ókinishke qaraı, álem elderinde bul vırýstyń taralýy azaımaı otyr. Qaýipti indetti juqtyrǵandardyń qatary Qazaqstanda da artyp keledi. ıAǵnı, sońǵy 10 jylda 2 esege jýyq ósken. Ótken jyly ınfektsııa juqtyrýdyń 4 myńnan astam jańa jaǵdaıy anyqtaldy. Qazir elimizde osy ınfektsııamen aýyratyn 30 myńnan astam adam turady. Olardyń jartysynan kóbi – eńbekke qabiletti jastaǵy adamdar. Ázirge, álem ǵalymdary bul vırýsty jeńýge dármensiz. Ol – búkil adamzat balasyna tóngen asa qaýipti dertke aınalyp otyr», - dedi Úkimet basshysy.

Sondyqtan ol vırýstyń aldyn-alý is-sharalaryn qoldaný, aýqymdy túsindirý jumystaryn júrgizý óte mańyzdy ekendigin basa aıtty.

«Naýqastardy halyqaralyq standarttarǵa sáıkes sapaly emdeýmen qamtamasyz etý qajet. Sonymen qatar, vırýsty tasymaldaýshylardyń barlyǵy qatań medıtsınalyq baqylaýda bolýy kerek», - dedi Álıhan Smaıylov.