Air Astana keńesshi jaldap, Londondaǵy IPO-ǵa daıyndyqty bastady - Bloomberg

<p>Qazaqstannyń eń iri áýe kompanııasy Air Astana óz aktsııalaryn otandyq platformaǵa jáne London qor bırjasyna shyǵarýǵa daıyndalyp jatyr, dep habarlaıdy <a href="https://www.bloomberg.com/news/articles/2023-11-29/air-astana-is-said-to-hire-advisers-for-london-ipo-in-early-2024" target="_blank" rel="noopener">Bloomberg</a> óz derekkózine silteme jasap.&nbsp;</p>

Jyldar boıy keıinge qalyp kelgen bul naýqan 2024 jyldyń alǵashqy toqsanyna josparlanyp otyr, degenmen mámileniń naqty ýaqyty naryq jaǵdaıyna qaraı belgilenedi.

Áýe kompanııasy sheteldegi lıstıngke kómek beretin halyqaralyq keńesshi retinde Citigroup, Jefferies Financial Group jáne Wood & Co kompanııalaryn, al ishki naryqta jumys isteý úshin Halyk Finance, BCC Invest, Jusan Invest jáne SkyBridge Invest kompanııalaryn jaldady.

Aldyn ala málimetke sensek, IPO-da kompanııa shamamen 1 mlrd dollarǵa baǵalanýy múmkin.

Onyń aıasynda brıtandyq BAE Systems qorǵanys kompanııasy men Qazaqstannyń «Samuryq-Qazyna» ulttyq ál-aýqat qory óz úlesiniń bir bóligin ınvestorlarǵa usynady.

Qazirgi ýaqytta Air Astana aktsııalarynyń 49% — BAE Systems-ke, al 51% — ulttyq ál-aýqat qoryna tıesili.   

Aktsıonerler ózderiniń jalpy úlesin shamamen 50% deıin qysqartýdy josparlap otyr.

Sonymen qatar, naýqan kezinde qosymsha aktsııalar shyǵarylady.

Bloomberg derekkózi qazirdiń ózinde áleýetti satyp alýshylarmen kelissóz júrip jatqanyn málimdedi.

Air Astana ulttyq áýe tasymaldaýshy mártebesin saqtap qalý úshin mámile aktsııanyń baqylaý paketine Qazaqstan azamattary men uıymdary ǵana ıe bolatyndaı etip jasalǵan.