Air Astana avıaotyndy Qytaıdan satyp alatyn boldy

<p>Air Astana jáne PetroChina International Kazakhstan strategııalyq áriptestik týraly memorandýmǵa qol qoıdy, dep habarlaıdy <a href="https://kaz.inform.kz/" target="_blank" rel="noopener">Kazinform</a>.&nbsp;</p>

Memorandým sheńberinde kompanııalar áýekerosın jetkizý máselesi boıynsha yntymaqtasýǵa, ınfraqurylym qurý jáne halyqaralyq standartqa sáıkes Jet A-1 avıaotynǵa kóshý jumysyn júrgizýge kelisti.

Qazaqstanda otynnyń osy túri óndirilmeıdi.

Sondyqtan kompanııalar sondaı-aq Jet A-1 jáne ekologııalyq taza avıatsııalyq otyndy (SAF) Qytaıdyń munaı óńdeý zaýyttarynan tikeleı ımporttaý máselesin talqylady.

«Biz marshrýttyq jelini belsendi keńeıtip, áýe parkimizdi únemi jańa ushaqtarmen ulǵaıtamyz. Otynmen qamtamasyz etý máselelerinde seriktesterimizdiń qoldaýy Air Astana-nyń odan ári ósip damýy úshin qolǵabys bolmaq. ESG strategııamyzǵa sáıkes avıatsııada ınnovatsııalyq jáne ekologııalyq bastamalardy engizý nıetimizde turaqtymyz», - dep atap ótti Air Astana kompanııalar tobynyń prezıdenti Pıter Foster. 

Jet A-1 — IATA (Halyqaralyq áýe kóligi qaýymdastyǵy) standarttaryna sáıkes otyn túri.

Jet A-1 álemdik brendi Qazaqstanda qoldanylatyn TS-1/RT markalarynan óndiris pen saqtaý tehnologııasymen erekshelenedi.

Janarmaıdyń artyqshylyqtary qatarynda órt qaýpiniń tómendigi, atmosferaǵa túsetin gaz quramy jáne avıatsııalyq qozǵaltqyshtardy jóndeý aralyq tsıkliniń artýy bar.