Air Astana áýekompanııasyn IPO-ǵa shyǵarý keıinge shegerildi

NUR-SULTAN. QazAqparat – «Samuryq-Qazyna» ulttyq ál-aýqat qory Air Astana áýekompanııasyn IPO alańyna shyǵarý máselesin keıinge shegerdi, dep habarlaıdy QazAqparat tilshisi.

«Samuryq-Qazyna» ulttyq ál-aýqat qorynyń basqarma tóraǵasy Almasadam Sátqalıevtiń aıtýynsha, barlyq portfeldik áýekompanııa arasynda «AirAstana» IPO-ǵa barynsha daıyndaldy.

Biraq álemdegi qazirgi jaǵdaıǵa, sonyń ishinde Eýrazııanyń eýropalyq bóligindegi qaqtyǵysqa baılanysty bıyl IPO-ǵa shyqpaý jáne kelesi ınvestıtsııalyq múmkindikti kútý týraly sheshim qabyldanyp otyr.

«Bul rette biz kompanııanyń kapıtalyna belgili bir sharttardy usyna alatyn áleýetti, strategııalyq ınvestorlarmen belsendi jumysty bastap kettik», - dep túsindirdi ulttyq qor basshysy.

Eske sala ketsek, bıyl mamyrda «Samuryq- Qazyna» ál-aýqat ulttyq qorynyń basqarma tóraǵasy Almasadam Sátqalıev AirAstana-ny IPO-ǵa shyǵarý týraly sheshim jazda qabyldanatynyn habarlaǵan edi.

Buǵan deıin ulttyq qor basshysy «QazMunaıGaz» aktsııalarynyń AIX jáne KASE alańynda IPO-ǵa shyǵatynyn aıtty.