Air Astana Almaty-Astana baǵytyndaǵy reıstiń nege 9 saǵatqa keshikkenin túsindirdi
Eske salsaq, atalmysh reıstiń keshigýine baılanysty Májilis depýtaty Baqytjan Bazarbek áleýmettik jelige vıdeo jarııalap, reıske jaýapty Air Astana áýe kompanııasynyń prezıdenti Pıter Fosterdiń jolaýshylar aldyna áreń shyqqanyn habarlaǵan.
Osydan keıin kompanııanyń baspasóz qyzmeti ushaqtan aqaý shyqqandyqtan jolaýshylar qolaısyzdyqqa tap bolǵanyn aıtyp, resmı habarlama taratty.
«10 tamyzda saǵat 07.15-te josparlanǵan Astana-Almaty baǵyty boıynsha KC622 reısi qozǵaltqysh qalaqtarynyń zaqymdalýyna baılanysty keıinge qaldyryldy. Reıs sol kúni saǵat 16:20-da FlyArystan ushaǵymen ushady dep josparlanǵan. Jolaýshylar qonaqúıge ornalastyrylyp, tamaqpen qamtamasyz etildi. Buryn habarlanǵandaı, Astanada burshaq jaýyp, áýe kompanııasynyń tórt ushaǵy buzylyp, jóndeý jumystary júrgizilip jatyr. Áýekompanııasy reıstiń keshigýine ókinedi jáne qolaısyzdyqty azaıtý úshin qoldan kelgenniń bárin jasap jatyr», - dep jazylǵan kompanııanyń málimetinde.
Depýtat Baqytjan Bazarbek tutynýshylardyń quqyqtaryn qorǵaý zańnamasyna áýejaılardyń qyzmetin retteıtin memlekettik organdardyń aıyppul salý baǵytyndaǵy ókiletin arttyratyndaı ózgerister engizemiz dep otyr.
«Zańnyń ondaı talaptaryn Nazarbaev dáýirinde olıgarhtardyń paıdasyna ózgertip jibergen. Sol normalardy qaıta qarap, aıyppul salý tetikterin jetildiremiz. Odan keıin prokýratýra organymen birlesip áýe kompanııalarynyń, sonyń ishinde dál osy Air Astana-nyń jumysyn tekseremiz», - deıdi depýtat.