Air Astana 2 maýsymda ushaqta bolǵan keleńsiz jaǵdaıǵa qatysty túsinik berdi
Áleýmettik jelide ushaq salonynda qamalyp otyrǵan jolaýshylardyń vıdeosy tarady. Beınejazbadan adamdardyń ózin jaısyz sezingenin baıqaýǵa bolady.
2 maýsym kúni "Astana-Almaty" baǵytynda ushqan FlyArystan loýkosteriniń KC 7332 reısin Air Astana áýekompanııasy oryndady. Ushaq Almaty qalasyna keshigip 19:30-da qondy. Áýe kemesi turaqqa jetkennen keıin ekıpaj jolaýshylardy ushaqtan shyǵarý úshin arnaıy trapty kútýge májbúr boldy. Trap jetkizý áýejaıǵa kelgen reısterdiń kóptigine baılanysty keshiktirildi.
«Kútip turǵanda ushqyshtar men bortserikter jolaýshylarǵa trap keshiktirilip jatqanyn habarlap, ushaqtaǵy ishetin sýdy taratyp berdi. Ókinishke qaraı, ushaq qonǵannan keıin kondıtsıoner jumys istemeı, jolaýshy áıel álsirep qaldy. Bortserik kómektesý maqsatynda oǵan sý ishkizip, ottegi balonyn alyp keldi. Birneshe jolaýshy ushaq esigin ashýǵa tyrysty. Ekıpaj músheleri qaýipsizdik erejeleri boıynsha ushaqtan adam qulap ketpeý úshin trap kelgenshe esik ashýǵa bolmaıtynyn túsindirdi», - dep habarlady kompanııadan.
Alaıda jolýshylardyń biri eskertýge qulaq aspaı saqtandyrý qaqpaǵyn ashyp, esiktiń tutqasyn joǵary kóterdi. 20:15-te kólik trapty jetkizip, olarmen qosa áýejaıdaǵy jelilik polıtsııa qyzmetkerleri de keldi.
«Air Astana áýekompanııasy toby keltirgen qolaısyzdyq úshin KC 7332 reısi jolaýshylarynan keshirim suraıdy. Áýekompanııa men áýejaı qyzmetteri ishki tekserý júrgizedi», - delingen habarlamada.