AIIB men QR Energetıka mınıstrligi memorandýmǵa qol qoıdy

NUR-SULTAN. QazAqparat – QR Energetıka mınıstrligi men Azııa Infraqurylymdyq Investıtsııalar Banki (AIIB) Qazaqstanda jańartylatyn energııa kózderin paıdalanýdy damytýdy qoldaý jáne yntymaqtastyq máseleleri boıynsha ózara túsinistik týraly memorandýmǵa qol qoıdy. Bul týraly QR Energetıka mınıstrliginiń baspasóz qyzmeti habarlaıdy.

Memorandým Energetıka mınıstrligi men AIIB arasynda jańartylatyn energııa kózderi sektoryndaǵy yntymaqtastyqty damytýdy jáne Mınıstrliktiń osy saladaǵy AIIB ınvestıtsııalyq qyzmetin qoldaýdy kózdeıdi.

Mınıstrlik pen AIIB jańartylatyn energııa kózderi salasyndaǵy jobalardyń qorshaǵan ortaǵa teris áserdi tómendetý úshin mańyzy zor ekenin atap ótti. Taraptar óz quzyreti men qyzmet beıini sheńberinde Qazaqstan Respýblıkasynyń ekonomıkasyna AIIB men basqa da halyqaralyq qarjy ınstıtýttary men jeke ınvestorlardy qarjylandyrýdy tartý úshin Instıtýtsıonaldyq baza men túıindi sharttardy jetildirýde ózara yntymaqtasta bolady.

AIIB Qazaqstandaǵy jańartylatyn energııa kózderi salasyndaǵy birqatar jobalardy qarjylandyrý boıynsha belsendi jumys isteýde. Ózara túsinistik týraly Memorandýmǵa qol qoıý AIIB-niń osy jobalarǵa qatysýy úshin berik negiz qalyptastyrady. AIIB Investıtsııalyq komıteti maquldaǵan Qazaqstandaǵy birinshi joba Qazaqstannyń ońtústiginde Jambyl oblysynda qýaty 100 MVt Jańatas jel elektr stantsııasynyń qurylysy bolyp tabylady.