Aıda Balaeva: Jýrnalısterdiń mıtıngte jumys isteý qaǵıdalary qaǵaz júzinde qalmaýy kerek

NUR-SULTAN. QazAqparat – QR Aqparat jáne qoǵamdyq damý mınıstri Aıda Balaeva jýrnalısterdiń beıbit jınalysta qyzmet etý qaǵıdalaryn jaýapty memorgandarǵa túsindirý úshin arnaıy semınarlar uıymdastyrylatynyn málim etti, dep habarlaıdy QazAqparat tilshisi.

Buǵan deıin habarlaǵanymyzdaı , Aqparat jáne qoǵamdyq damý mınıstrliginiń Facebook-tegi paraqshasynda jýrnalısterdiń beıbit jınalystarda qyzmet etý qaǵıdalary talqylanǵan bolatyn.

Onlaın-kezdesý barysynda BAQ basshylary beıbit jıynǵa qatysatyn jýrnalısterdiń quqyǵyn qorǵap, jumysyn júrgizýge qatysty birqatar usynysty ortaǵa saldy .

«Búgin shynymen de ashyq áńgime bolǵan sııaqty. Bul - talqylaýdyń basy ǵana. Sebebi qaǵıdalar áli bekitilgen joq. Eń bastysy – sizderdiń talqylaýdan keıin usynystaryńyzdy eskere otyryp, jobany taǵy da bir qaraımyz. Sodan keıin normatıvti-quqyqtyq aktilerdiń ashyq portalyna resmı túrde ornalastyramyz. Óz usynystaryńyzdy engizýge bolady», - dedi Aıda Balaeva BAQ basshylarymen onlaın-kezdesý barysynda.

Mınıstr jýrnalısterge arnalǵan qaǵıdalardy jergilikti atqarýshy organdar men quqyq qorǵaý organdaryna túsindirý jumystary men arnaıy semınarlar júrgiziletinin málim etti.

«Eger bir taraptan túsinispeýshilik bolǵan jaǵdaıda biz aıtyp otyrǵan qaǵıdattardyń bári de júzege asyrylmaı qalady-aý degen qaýip bar. Biz óte jaqsy erejelerdi jasaǵanymyzben ol sapaly túrde iske asyp jatpasa, álbette, bul qaǵıdattardyń bári de qaǵaz júzinde ǵana qalady», - dedi ol.