Aıda Balaeva jýrnalısterdi akkredıtteý tártibine qandaı ózgeris engizilgenin túsindirdi

<p>ASTANA. KAZINFORM &ndash; Mádenıet jáne aqparat mınıstri Aıda Balaeva BAQ ókilderin is-sharalarǵa tirkeýdiń jańa tártibine qatysty túsinikteme berdi.</p>

«Jalpy atalǵan qujat jobasy qoldanystaǵy erejelermen salystyrǵanda asa kóp ózgermegen. Mysaly, akkredıtteýden bas tartý negizderi týraly erejelerge toqtalsaq. Bul BAQ-tyń jumys isteýin ýaqytsha toqtatý nemese múldem jabý jáne resmı reestrde tirkelmegeni týraly sot sheshimi kúshine engen jaǵdaıda iske asady», - dep jazdy Aıda Balaeva Facebook paraqshasynda. 

Odan ári mınıstr jýrnalıstter arasynda eń kóp suraq týdyrǵan jańa erejeniń 10-tarmaǵyna, atap aıtqanda BAQ ókilderi saqtaýy tıis talaptarǵa toqtaldy.

Birinshiden, kez kelgen jýrnalıst qaı BAQ atynan akkredıtatsııadan ótse, sol redaktsııaǵa ǵana aqparatty jınap, jarııalaı alady. Alaıda jýrnalıstke birden birneshe BAQ atynan akkredıtatsııa alýǵa eshkim tyıym salmaıdy.

Ekinshiden, bul talap belgili bir oqıǵaǵa/is-sharaǵa qatysty jýrnalısterdiń jeke pikirleri men ustanymdaryn áleýmettik jelilerdegi jeke paraqshalaryna bildirýge qatysy joq.

Úshinshiden, reglament máselesine keletin bolsaq, qoldanystaǵy erejelerde qazirdiń ózinde is-sharaǵa qatysýshylardyń taqyrypty, ýaqyt tártibin, qoǵamdyq tártipti saqtaýyn júrgizýshi (ıaǵnı, is-shara moderatory) qamtamasyz etetini qarastyrylǵan.

AQSh pen Eýropalyq Odaqtyń jáne halyqaralyq uıymdardyń halyqaralyq tájirıbesi kórsetkendeı, belgilengen erejelerdi, sondaı-aq zańnamany buzǵan jaǵdaıda jýrnalıst is-sharalarǵa qatysý quqyǵynan jáne akkredıtatsııadan aıyrylady. Mysaly, Eýroparlamenttegi BAQ qyzmetin retteıtin erejede túsirilimge ruqsat etilgen arnaıy oryndar qatań túrde belgilengen.

Tórtinshiden, erejede árbir memlekettik organnyń nemese uıymnyń belgili bir is-sharanyń reglamentin ózi bekitetindigi kórsetilgen. Bul rette mınıstrlik ýákiletti organ retinde aqparatqa qoljetimdilik qaǵıdattaryn jáne jýrnalısterdiń erekshe mártebesin saqtaý máseleleri boıynsha atalǵan reglamentti ázirleý boıynsha tıisti usynystaryn jiberetin bolady.

Besinshiden, erekshe mańyzdy memlekettik obektilerge kirý jáne sol mekemelerdegi rejımderdi ustaný da qoldanystaǵy zańnamany saqtaý men qaýipsizdiktiń aınymas bóligi.

«Qorytyndylaı kele, aqparatqa qoljetimdilikti qamtamasyz etý men jýrnalısterdiń mártebesin arttyrý – árqashan mınıstrlik qyzmetiniń basty basymdyǵy ekenin taǵy da jetkizgim keledi», - deıdi Aıda Balaeva.

Aıta ketsek, keshe jýrnalısterdi akkredıtteý tártibiniń ózgeretini týraly habarlaǵan edik. 

Eske sala keteıik, Memleket basshysy 19 maýsymda «Mass-medıa týraly» zańǵa qol qoıdy.