Aıda Balaeva jýrnalıst pen depýtat arasyndaǵy kıkiljińge qatysty pikir bildirdi

NUR-SULTAN. QazAqparat – QR Aqparat jáne qoǵamdyq damý mınıstri Aıda Balaeva BAQ ókili men depýtat arasynda bolǵan túsinispeýshilikke qatysty túsinik berdi, dep habarlaıdy QazAqparat tilshisi.

«Búgin Parlament ǵımaratynda jýrnalıst A.Koskına men suhbat berýshi B. Tileýhan arasynda bolǵan oqıǵa jýrnalıstıka kásibiniń erekshe qarym-qatynas daǵdylaryn qajet etetin erekshe mamandyq ekendigin kezekti ret dáleldedi. Árıne, suhbat berýshiniń jýrnalıstke qatysty emotsııalyq áreketin aqtaý qıyn (ásirese jýrnalıstiń áıel balasy ekenin eskersek)», - dep jazdy Aıda Balaeva Facebook paraqshasynda.

Sondaı-aq, mınıstr suhbat barysynda mádenıet pen etıkanyń saqtalý kerektigin eske saldy.

«Dese de, máseleniń ekinshi jaǵy da bar, ol – jýrnalıstiń kásibı biligi men ishki mádenıeti. Spıkerdiń jeke ómiriniń qupııalyǵy men quqyǵyn saqtaý, taqyryp aýqymyndaǵy suraqtardan tys aýytqymaý, dıalog logıkasyn naqty ustaný – bul eshkim joqqa shyǵarmaıtyn jalpyǵa ortaq órkenıet erejeleri. Qalaı bolǵanda da Aqparat jáne qoǵamdyq damý mınıstrligi jýrnalısterdiń zańdy múddesin, kásibı quqyǵyn zań aıasynda qorǵaýǵa qashanda daıyn», - deıdi ol.