Aıda Balaeva: Jas ǵalymdar qazaqstandyq jáne álemdik ǵylymdy damytýǵa laıyqty úlesin qosady

NUR-SULTAN. QazAqparat - Elimizdiń jas ǵalymdary qazaqstandyq jáne álemdik ǵylymdy damytýǵa laıyqty úlesin qosyp keledi. Bul týraly elordada Turaqty damý jáne ınnovatsııalar boıynsha ekinshi Ortalyq Azııa forýmynyń ashylýynda QR Prezıdenti Ákimshiligi ishki saıasat bóliminiń meńgerýshisi Aıda Balaeva málim etti, dep habarlaıdy QazAqparat tilshisi.

«Ǵylymdy damytý - jahandyq álemde Qazaqstannyń básekege qabilettiginiń negizgi faktory retinde moıyndalady», - dedi Aıda Balaeva.

Prezıdenttik biregeı «Bolashaq» baǵdarlamasynyń arqasynda jas ǵalymdar ózderiniń zertteýlerin álemniń ozyq ǵylymı ortalyqtarymen seriktestikte júrgize alady.

«Sonymen qatar, startaptar men jańa tehnologııalyq óndiristerdi damytý úshin mańyzdy ekoorta retinde Nazarbaev Ýnıversıtetiniń ǵylymı-ınnovatsııalyq parki belsendi damyp keledi. Úzdik bilim men tájirıbeni alǵan bizdiń jas ǵalymdar qazaqstandyq ári álemdik ǵylymdy damytýda óziniń laıyqty úlesin qosatynyna senimdimin», - dedi Aıda Balaeva.

Budan buryn habarlanǵandaı, forým QR Bilim jáne ǵylym mınıstrliginiń, jas ǵalymdardyń, Ulybrıtanııadaǵy qazaqstandyq doktoranttar qaýymdastyǵynyń, Qazaqstannyń Ulybrıtanııadaǵy Elshiliginiń uıymdastyrýymen ótti.

Forým maqsaty - ıdeıalar men jobalardy ilgeriletý úshin jas ǵalymdardy biriktirý, áleýetti ınvestorlarmen jáne seriktestermen baılanystardy ornatý.