Aıda Balaeva: Ulttyq jobalar – rýhanı damýǵa baǵyttalǵan ulttyq máseleler

ALMATY. QazAqparat - Búgin Vıtse-premer Eraly Toǵjanov Qazaqstan Prezıdenti Qasym-Jomart Toqaev reformalar jónindegi joǵary keńeste bekitken Ulttyq jobalardy iske asyrý tetikteri boıynsha Almaty qalasynyń shyǵarmashylyq zııaly qaýymy ókilderimen kezdesý ótkizdi. Kezdesýde «Ulttyq rýhanı jańǵyrý» baǵyty boıynsha Aqparat jáne qoǵamdyq damý mınıstri Aıda Balaeva, Mádenıet jáne sport mınıstri Aqtoty Raıymqulova, Bilim jáne ǵylym vıtse-mınıstri Sholpan Karınova baıandady, dep habarlaıdy QazAqparat.

«Ulttyq jobalardyń barlyǵy da tutas qoǵamnyń rýhanı damýyna baǵyttalǵan ulttyq máseleler. Bul jobalar negizinen halyqtyń jas erekshelikterine qaraı toptastyryp, naqty aýdıtorııaǵa arnalyp otyr. Máselen, bala-baqshalar men bastaýysh mektep balalaryna – «Ulttyq tárbıe» jobasy, orta mektep oqýshylaryna arnalǵan – «Aqyldy urpaq» , joǵary synyp oqýshylary men stýdent jastardy qamtıtyn – «Kemel bolashaq» jobalary naqty jastar aýdıtorııasyna baǵyttalady», dedi mınıstr Aıda Balaeva. Budan bólek, vedomstvo basshysy «Ulttyq Rýhanı jańǵyrý» Ulttyq jobasynyń Úshinshi negizgi baǵyttarynyń biri - «Táýelsizdik Urpaqtary» baǵytyna da toqtalyp ótti . Onyń aıtýynsha,joba 2025 jylǵa deıin jastardyń negizgi bazalyq suranystary: turǵyn úı máselesi, jumyspen qamtý, sapaly bilim berý, belsendi jastardy qoǵamdyq isterge tartý, jastardyń startap-jobalaryn qoldaý boıynsha «Táýelsizdik urpaqtary» granttaryn bólý, ekologııalyq saýattylyqty arttyrý sekildi máselelerdi sheshýdi qarastyrady.

«Jalpy, «Táýelsizdik Urpaqtary» baǵyty boıynsha:

- 2025 jylǵa deıin volonter jastardyń sanyn 2 mıllıonǵa deıin arttyrý;

- «Jasyl El» jobasy aıasynda 30 myńnan astam qala jáne aýyl jastaryn jumyspen qamtý;

- jumyssyz júrgen jáne oqý oqymaıtyn NEET sanatyndaǵy jastar úlesin 5%-ǵa deıin tómendetý;

- jastar uıymdaryna arnalatyn jobalardy qarjylandyrý kólemin 1,5 esege arttyrý; sonymen qatar,

- 2025 jyly – 1,2 mıllıon jastardy jappaı buqaralyq sportpen aınalysýyn qamtamasyz etý naqty kózdelgen.

Bul atalǵan jobalardyń barlyǵy Respýblıkanyń ár óńirinde bar Jastar resýrstyq Ortalyqtary arqyly júzege asatyn bolady.

Mınıstrdiń málimetine sáıkes, qazirgi tańda otandyq arnalarda tarıhı-tanymdyq baǵyttaǵy 30-dan astam arnaıy baǵdarlama bar. Sonymen qatar, tarıhı serıaldar túsirý jobasy qolǵa alynǵan. Al, memlekettik telearnalardaǵy baǵdarlamalar men serıaldyq ónimderdiń 30%-y tarıhı taqyrypta. Máselen, tarıhı-tanymdyq baǵyttaǵy «Jumabek Táshenov», «Domalaq Ana», «Saraı syry», «Jambyl Jabaev» syndy tarıhı tulǵalarǵa arnalǵan 13 teleserıal kórermen nazaryna usynylǵan.

Atalmysh jobalardy nazarǵa ala kele, kezdesý sońynda, el rýhanııatynyń belsendileri, zııaly qaýym ókilderi bul aýqymdy Jobalar bútin bir Eldiń aldynda turǵan ortaq mindet ekenin atap ótip, Qazaqstandyqtardyń ómir súrý sapasyn jaqsartýǵa jáne ekonomıkanyń básekege qabilettiligin arttyrýǵa baǵyttalǵan ulttyq jobalardy sapaly júzege asyrý úshin birlesip jumys jasaýǵa daıyndyǵyn bildirdi.