Aıda Balaeva: Óńirlerde jastar máselesi boıynsha tyńdaýlar ótkizýdi usynamyz
Atalmysh sharany mınıstrlik ókilderi Qazaqstan Jastar kongresimen seriktestikte respýblıkanyń barlyq aımaqtaryn onlaın formatta baılanystyra otyryp, júzege asyrdy, dep habarlaıdy QazAqparat tilshisi.
«Búgin elimizdiń jastary úshin erekshe shara. Árıne, onyń mán-mańyzy týraly uzaq aıtýǵa bolady. Biraq, men onyń bárin Elbasymyzdyń «Bizdiń maqsatymyz - jastardy jańa álemde ómir súrýge úıretý» degen bir ayz sózimen túıindegim kelip otyr. Óıtkeni, «Zeren» jobasynyń basty maqsaty osy. Sondyqtan bul jobaǵa ómirin ónegemen órgen erekshe tulǵalar qatysyp, aqylyn aıtyp, kórgen-bilgenin úıretedi»,- dedi jobany iske qosýǵa arnalǵan saltanatty sharada sóz sóılegen QR Aqparat jáne qoǵamdyq damý mınıstri Aıda Balaeva.
Mınıstr kelesi jyly elimiz Táýelsizdiginiń 30 jyldyǵyn atap ótkendigin aıtty.
«Osy ýaqyttyń ishinde elimizde jańa da jasampaz urpaq qalyptasty. Bul sanasy erkin, júregi azat jastar. Sóz joq, olardyń jetistigi de, oı-órisi de ata-analarynan asyp túsedi. Desek te, ár zamannyń, ár ýaqyttyń ózi mindeti bar. Myna kelgen indet kórsetkendeı, qazirgi jaǵdaıda kóp másele kózqarasty qaıta qaraýdy talap etip otyr. Árıne, búgingi «Zeren» alańy osy baǵyttaǵy úlken jumysty atqarady degen senimdemiz. Bul shara jastarǵa bilim berýmen qatar olardyń qundy pikirlerin, keremet ıdeıalaryn tyńdaý, qajetti qoldaý kórsetý maqsatynda uıymdastyrylyp otyr»,- dedi ol.
Sonymen qatar Aıda Balaeva sanaly, bilimdi, belsendi jastary kóp eldiń bolashaǵy zor ekendigin basa aıtty.
«Mundaı jastar elimizdiń ár túkpirinen tabylady. Sol sebepti, jastar máselesin talqylaýdy búgingi bir ǵana is-sharamen shektelmeı, búkil eldiń deńgeıinde jalǵastyrýymyz kerek. Óz tarapymyzdan biz Táýelsizdiktiń 30 jyldyǵy aıasynda barlyq óńirlerde jastar máselesi boıynsha tyńdaýlar ótkizýdi usynamyz. Sizderdiń ortaǵa salar oılaryńyzdy tyńdap, qajetti qoldaý kórsetýdiń mańyzy biz úshin zor. Óıtkeni, qazirgi kezeń bul naǵyz is-qımyl kezeńi, jalyndy jastardyń ýaqyty, aryndy ul-qyzdardyń zamany», - dedi mınıstr.
Aıta keteıik, b ıylǵy jyly «Zeren» bilim berý lageri aıasynda onlaın formatta ótip jatqan joba aıasynda bir aıdyń ishinde jas qazaqstandyqtar óz bilimin arttyryp, bilikti jattyqtyrýshylardy, sarapshylardy jáne ózge de shaqyrylatyn qonaqtardy jobaǵa tarta otyryp, jańa kóshbasshylyq jáne ómirlik qarim-qabiletterge ıe bolady. Jumys bes negizgi baǵyt boıynsha júzege asyrylady: azamattyq belsendilik, eriktiler, aqparattyq tehnologııalar, jastar kásipkerligi jáne jeke damý.
Joba onlaın-formatta júzege asyrylatyndyqtan oǵan elimizdiń túkpir-túkpirinen jastar ókilderi qatysa alady.
Eske sala ketsek, 2018 jyly Dúnıejúzilik jastar kúninde Zeren jastar bilim berý ortalyǵy quryldy. Bıylǵy jyly epıdemıologııalyq jaǵdaıǵa baılanysty bilim berý baǵdarlamalary onlaın-formatta ótkiziletin bolady. «Jastar men jańa syn-qaterler: áreket etetin ýaqyt» atty taqyryptyq ataýy bar onlaın-oqytý bes baǵyt boıynsha ótkiziledi: azamattyq belsendilik, eriktiler qyzmeti, aqparattyq tehnologııalar, jastar kásipkerligi jáne ózindik damý.