Aıda Balaeva Q.Bıshimbaevtyń sotyna tilshilerdiń kirgizilmeýine qatysty pikir bildirdi

<p>ASTANA. KAZINFORM &ndash; QR Mádenıet jáne aqparat mınıstri Aıda Balaeva buqaralyq aqparat quraldary ókilderiniń Qýandyq Bıshimbaevtyń isine qatysty sot otyrysyna nelikten jiberilmegendigi jóninde pikir bildirdi.</p>

Mınıstrdiń aıtýynsha, vedomstvo árqashan jýrnalıst quqyn shekteýge jol bermeý, aqparatqa erkin qol jetkizýdi qamtamasyz etý jáne obektıvti aqparat taratý ustanymyn berik saqtaıdy. Bul rette keshegi sot otyrysynda arnaıy orynnyń bolmaýyna baılanysty BAQ ókilderi sot otyrysyn belgilengen bólek bólmede otyryp kórdi.

«Alaıda BAQ ókilderine tıisti oryndar bolýy kerek. Osy jaǵdaıdy eskere otyryp, mınıstrlik múddeli memlekettik organdarmen birlesip, jýrnalısterdi qajet oryndarmen qamtý jumysyn júrgizetin bolady. Jalpy, BAQ ókilderin sot protsesin jarııalaý kezinde birqatar etıkalyq aspektilerdi, atap aıtsaq, zań ústemdigin, beıtarap ádilettilikti eskerip, jalǵan aqparattyń taralýynan jáne kez kelgen formada sot qyzmetine aralasýdan saq bolýǵa shaqyramyn»,-dep jazdy mınıstr óziniń Facebook paraqshasynda.

Osyǵan deıin Qýandyq Bıshimbaevtyń isi boıynsha aldyn ala tyńdaý bastalǵanyn jazdyq.

Astana qalalyq soty zaldarda qajetti jabdyq ornatylyp, otyrys tikeleı efırde kórsetilgenin, sondaı-aq, elorda sotynan aqparatty jedel alýǵa múmkindiktiń jasalǵanyn aıtty.