Aıda Balaeva Qazaqstandyq Medıa alıans basshysymen BAQ máselelerin talqylady

ALMATY. QazAqparat - Búgin Almaty qalasynda QR Aqparat jáne qoǵamdyq damý mınıstri Aıda Balaeva Qazaqstandyq Medıa alıanstyń basqarma tóraǵasy Armanjan Baıtasovpen kezdesti, dep habarlaıdy QazAqparat tilshisi.

Kezdesý barysynda QR Aqparat jáne qoǵamdyq damý mınıstrligi men Qazaqstandyq Medıa alıans arasynda ózara túsinistik pen yntymaqtastyq týraly memorandýmǵa qol qoıdy.
Aıda Balaeva pandemııa kezeńinde kommertsııalyq BAQ-ty qoldaý úshin mınıstrlik qabyldaǵan sharalar, aqparat salasyndaǵy zańnamany jetildirý, otandyq BAQ-tyń básekege qabilettiligin jáne adamı kapıtaldyń sapasyn arttyrý boıynsha josparlar týraly aıtty.
Eki jaq salanyń ózekti máseleleri, sonyń ishinde otandyq buqaralyq aqparat quraldaryn damytý, jýrnalısterdiń daıyndyq deńgeıin arttyrý, sondaı-aq olardyń quqyqtary men bostandyqtaryn qorǵaýdy qamtamasyz etý qajettiligi týraly pikir almasty.
Memorandým sheńberinde taraptar yntymaqtastyǵynyń negizgi baǵyttary aıqyndaldy: aqparat salasyndaǵy zańnamany jetildirý boıynsha usynystardy birlesip talqylaý; medıa salasy mamandaryn daıarlaý, qaıta daıarlaý, sondaı-aq olardyń biliktiligin arttyrý máseleleri; jýrnalısterdiń quqyqtary men bostandyqtaryn qorǵaýǵa járdemdesý.
Atap ótilgendeı, memorandým salanyń ózekti máselelerin sheshýde úkimettik emes sektordyń rólin arttyrýǵa múmkindik beredi.