Aıda Balaeva: Qazaqstan – genderlik saıasatta Ortalyq Azııada kóshbasshy

ASTANA. QazAqparat – Qazaqstan genderlik teńsizdikke qarsy is-qımyl máselesinde Ortalyq Azııada kóshbasshy sanalady Bul týraly elordada ótken І Ortalyq Azııa medıa forýmynda QR Prezıdenti Ákimshiligi basshysynyń orynbasary Aıda Balaeva aıtty, dep habarlaıdy QazAqparat tilshisi.

«Qazaqstan Táýelsizdik jyldarynda genderlik teńsizdikke qarsy is-qımyl salasynda birqatar progressıvti is-sharalar qabyldady. Bul memleket pen azamattyq qoǵamnyń birlesken kúsh-jigeriniń arqasynda ǵana múmkin boldy», - dedi Aıda Balaeva.

Spıker júrgizilip jatqan genderlik saıasat eldiń halyqaralyq reıtıngter men ındeksterdegi jaǵdaıyn jaqsartatynyn basa aıtty.

«2021 jyldyń qorytyndysynda genderlik teńdik ındeksi boıynsha Qazaqstan kórsetkishterin jaqsartty jáne reıtıngte 146-orynnyń ishinde 65-orynǵa kóterildi. Bul Ortalyq Azııa óńirindegi kóshbasshylyq pozıtsııa jáne biz kórsetkishterdiń turaqty jaqsarýyn jalǵastyrý úshin jumys istep jatyrmyz», - dedi ol.

Sondaı-aq QR Prezıdenti Ákimshiligi basshysynyń orynbasary Qazaqstannyń áıelderi negizgi pozıtsııalarǵa ıe ekenin aıtty.

«2030 jylǵa deıingi otbasylyq jáne genderlik saıasattyń qoldanystaǵy tujyrymdamasy osy kórsetkishterdi jaqsartýǵa múmkindik beredi. Taıaýdaǵy segiz jyl ishinde Qazaqstannyń genderlik alshaqtyqty aıtarlyqtaı qysqartý jospary bar», - dep atap ótti Aıda Balaeva.