Aıda Balaeva «Habar agenttigin 25 jyldyq mereıtoıymen quttyqtady

NUR-SULTAN. QazAqparat - Búgin Aqparat jáne qoǵamdyq damý mınıstri Aıda Balaeva «Habar», «Habar 24», «Kazakh TV», «El arna» sekildi arnalardy biriktiretin otandyq iri medıaholdıngti 25 jyldyq mereıtoıymen quttyqtady, dep habarlaıdy QazAqparat.

Búginde «Habar» - qalyptasqan damý strategııasy, joǵary bilikti mamandary jáne qyzyqty tehnıkalyq sheshimderi bar qazaqstandyq medıaındýstrııa kóshbasshylarynyń biri. «Habar» qurylǵannan bastap-aq tez tanymal boldy jáne qazaqstandyq medıakeńistikte erekshe rólge ıelenip, jetekshi telearnalardyń biri de biregeıi brendin ıelendi.

Mınıstr óziniń quttyqtaý sózinde «Habar» agenttigi shırek ǵasyr ishinde qazaqstandyq buqaralyq aqparat quraldary arasynda erekshe orynǵa ıe bolyp, birqatar juldyzdardyń, ulttyq qaıratkerlerdiń ustazy bolǵanyn atap ótti.

Sonymen qatar, óz sózinde mınıstr «Uıat bolmasyn», «77 kún», «Myń bir maqal», «Altybaqan», «HHІ ǵasyr kóshbasshysy» sekildi arnanyń taǵylymy mol baǵdarlamalary mıllıondaǵan kórermen júreginen jyldar boıy oryn alǵanyn eske saldy.

«Habar Agenttigi» AQ qyzmetkerlerin mereıtoımen quttyqtaı kele, mınıstr «Habar» arnasy otandyq telearnalardyń kóptegen juldyzdaryna jol ashqany, memlekettik saıasatty nasıhattaǵany, qoǵamdyq pikirdi qalyptastyryp, adamgershilikke baǵdar bergeni úshin úzdik ujymǵa alǵysyn bildirdi.

Quttyqtaý sońynda A.Balaeva «Habar Agenttigi» AQ komandasyna sarqylmas shabyt tiledi.

Eske salaıyq, búgin «Habar» telearnasynyń qurylǵanyna 25 jyl toldy.