Aıda Balaeva: Eńbek adamdary – memlekettiń eń basty qundylyǵy

<p>ASTANA. KAZINFORM &ndash; &laquo;Astana Balet&raquo; teatrynda QR Mádenıet jáne aqparat mınıstri Aıda Balaeva mádenıet salasyndaǵy bedeldi halyqaralyq jastar baıqaýlarynyń jeńimpazdaryn quttyqtady. Bul týraly mınıstrliktiń baspasóz qyzmeti málimdedi.</p>

Mınıstr jeńimpazdardy quttyqtaı otyryp, olardyń jetistikke jetýine ata-analary men ustazdarynyń úlesi zor ekenin aıryqsha atap ótti.

«Sizdermen júzdeskenime óte qýanyshtymyn. Bul kezdesý Respýblıka kúni qarsańynda ótýi tıis edi. Biraq merekege arnalǵan aýqymdy is-sharalarǵa baılanysty búgin ǵana jolyǵyp otyrmyz. Ulttyq merekemizge oraı, Memleket basshysy jáne onyń atynan biz túrli salada eńbek sińirgen qyzmetkerlerdi, túrli mamandyq ıelerin quttyqtadyq. Olardyń qatarynda ustazdar, dárigerler, qutqarýshylar, mádenıet qyzmetkerleri bar», – dedi Aıda Balaeva.

Mınıstr jas daryndardyń jetistikteri olardyń ustazdarynyń uzaq jylǵy tabandy eńbeginiń nátıjesi ekenin aıtty. 

Foto: Mádenıet jáne aqparat mınıstrligi

«Sizderdiń jetistikterińiz – ózderińizdiń ǵana emes, sondaı-aq ustazdaryńyz ben ata-analaryńyzdyń da qajyrly eńbeginiń nátıjesi. Eńbek adamdary – memlekettiń eń basty qundylyǵy. Sondyqtan búginde olardyń eńbegi joǵary deńgeıde moıyndalyp, qurmettelip otyr. Sizderge balalaryńyzdy tárbıeleýge jumsaǵan kúsh-jigerlerińiz úshin alǵys aıtamyn. Búginde Qazaqstanda túrli salada, onyń ishinde mádenıet pen óner salasynda jastardy qoldaýǵa jáne talantyn ashýǵa baǵyttalǵan kóptegen bastamalar men jobalar iske asyp jatyr. Memleket basshysy el bolashaǵy jastardyń qolynda ekenin únemi aıtyp keledi. Sizder óz qatarlastaryńyz ben keıingi urpaqqa úlgi bolasyzdar. Sizderdi alda úlken jeńister kútip turǵanyna senimdimin», - dedi mınıstr.

Foto: MIOR

Kezdesý barysynda qatysýshylar jas daryndardy qoldaýǵa jáne olardyń shyǵarmashylyq áleýetin damytýǵa baǵyttalǵan memlekettik jobalardy talqylady.

Kezdesý sońynda Aıda Balaeva baıqaý jeńimpazdary men olardyń ata-analaryna jáne ustazdaryna halyqaralyq arenadaǵy úshin alǵys hattar men estelik syılyqtar tabystady.

Buǵan deıin mınıstr óz kásibin jetik meńgergen mamandar ult sapasyn arttyratynyn aıtty.