Aıda Balaeva bolashaq jýrnalısterdiń 1-kýrstan bastap memlekettik BAQ-ta óndiristik tájirıbeden ótýine kómektespek
Bul týraly búgin medıa salasynyń mamandaryn daıyndaıtyn joǵary oqý oryndarynyń rektorlarymen kezdesken QR Aqparat jáne qoǵamdyq damý mınıstri Aıda Balaeva aıtty, dep habarlaıdy QazAqparat tilshisi.
«Shynymen de búgin eń ózekti, kókeıtesti máselelerdi ortaǵa salyp, óz usynystaryńyzdy aıttyńyzdar. Eń bastysy bizben tyǵyz qarym-qatynasta jumys isteýge nıetterińizdi bildirdińizder. Biz ony qýana-qýana qabyldaımyz. Óıtkeni, bizdiń mınıstrlik tek qana aqparat salasynda ǵana emes, jalpy quzireti óte keń memlekettik organ sanalady. Onyń ishinde jastar saıasaty, rýhanı jańǵyrý baǵdarlamasyn júzege asyrý máseleleri, din, etnosaıasat máseleleriniń bárin qamtyp otyrǵan birden-bir memlekettik organ. Sondyqtan osy salalardyń barlyǵynda ózderińizben tyǵyz qarym-qatynasta bolýǵa jáne áriptestik ornatýǵa daıynbyz», - dedi kezdesýdi qorytyndylaǵan Aıda Balaeva.
Sonymen qatar mınıstr búgingi bas qosýda talqylanǵan jýrnalıstıka taqyrybyna toqtaldy.
«Árıne, jýrnalıstıka - kúrdeli mamandyq, kúrdeli ǵylym salasy. Sondyqtan elimizdegi baspasóz jaıly aıtylatyn áńgime de, zertteıtin másele de, jetildiretin tustar da az emes. Baspasózi myqty qoǵamnyń mádenıeti men talǵamy da, rýhanı deńgeıi de azamattyq belsendiligi de joǵary bolady. Osy oraıda, joǵary oqý oryndarynyń mamandardy daıyndaýy bilim berý mazmunymen tikeleı baılanysty. Al joǵary oqý oryndaryndaǵy oqýdyń mazmundyq sapasyn jańǵyrtý, ony ýaqyt talabyna saı jetildirý máselesi óte ózekti taqyryp. Bul oraıda mınıstrlik oqý materıaldarynyń sapasyn qadaǵalap, qajet bolǵan jaǵdaıda olardyń mazmundyq jaǵyn birge saralap, birge ázirleý úshin áriptestik ornatýǵa qashanda daıyn», - dedi ol.
Onyń atap ótýinshe, bul óz kezeginde mınıstrlik pen joǵary oqý oryndary arasyndaǵy yntymaqtastyqty nyǵaıtyp, stýdentterdiń naqty kásibı deńgeıin kóterýge múmkindik beredi.
«Dıplom alyp shyqqan jas jýrnalısterge taǵylatyn synnyń biri - olardyń praktıkalyq turǵyda daıyn bolmaýy. ıAǵnı, joǵary oqý ornynda beriletin teorııalyq bilimniń praktıkamen jalǵaspaýy. Kóp jaǵdaıda jas mamandar praktıkany jumysqa turǵan soń úırenýge májbúr. Bul oraıda stýdenttik praktıkalyq daǵdylaryn damytý úshin Aqparat jáne qoǵamdyq damý mınıstrligi jýrnalıstıka mamandyǵyn ıgerip jatqan stýdentterdiń 1-kýrstan bastap memlekettik BAQ-tarda óndiristik tájirıbeden ótýine kómektesýge daıyn», - dedi Aıda Balaeva.