Aıda Balaeva: Atyraý – ulttyq salt-dástúrge berik, rýhanııaty joǵary meken

ATYRAÝ. QazAqparat – QR Aqparat jáne qoǵamdyq damý mınıstri Aıda Balaeva Atyraý oblysynda Qoǵamdyq keńes múshelerimen, shyǵarmashylyq zııaly qaýym ókilderimen, sondaı-aq oblys ákimdiginiń aktıvimen birqatar kezdesý ótkizdi, dep habarlaıdy QazAqparat.

Mınıstrliktiń baspasóz qyzmetinen málim etkendeı, A.Balaevanyń jumys sapary baǵdarlamasyndaǵy mańyzdy shara — Atyraý oblysy Qoǵamdyq keńesiniń múshelerimen kezdesý boldy.

Aıda Balaeva osy jyly qabyldanǵan zańnamalyq túzetýlerdi eskere otyryp, Qoǵamdyq keńesterdiń qyzmetin úılestirý boıynsha atqarylyp otyrǵan jumys týraly aıtyp berdi. Mınıstr atyraýlyq Qoǵamdyq keńes múshelerin olarǵa berilgen zańnamalyq ókilettikterdi óńir ıgiligi úshin belsendi ári tıimdi paıdalanýǵa shaqyrdy.

Odan bólek zııaly qaýym ókilderimen jeke kezdesý barysynda mınıstr «Ulttyq rýhanı jańǵyrý» jobasyn tanystyryp, onyń negizgi úsh baǵyty boıynsha josparlanǵan is-sharalar týraly baıandady. Atap aıtqanda: eldiń zııatkerlik áleýetin jáne memlekettik tildiń mártebesin arttyrý, «El rýhy» atty mádenıet salasyndaǵy qyzmetterdiń qoljetimdiligin arttyrý boıynsha sharalar keshenin iske asyrý, sondaı-aq «Táýelsizdik urpaqtary» atalatyn jastar úshin jańa múmkindikter jasaý baǵyty.
Eske sala keteıik, ulttyq joba jeti mindetti, 20-dan astam kórsetkishti jáne 60-tan astam iri is-sharany qamtıdy.

«Atyraý óńiri – qaı kezde de qazaqylyǵyn joǵaltpaǵan, ulttyq salt-dástúrge berik, rýhanııaty joǵary meken. Biz qazir «Rýhanı jańǵyrý» baǵdarlamasy aıasynda ótken tarıhymyzdy túgendep, kóptegen oqıǵalarǵa jańasha baǵa berip jatyrmyz. Bul jumysta, osy mańyzdy óńirdiń tarıhyn túgendep, rýhanııatyn kóterip, óskeleń urpaqqa ulttyq tárbıe berip, durys jol kórsetetin el zııalylylary — sizderdiń qoldaýlaryńyz qajet»,- dedi A.Balaeva.

Vedomstvo basshysy el damýynda Memleket basshysy ulttyq ıntellıgentsııanyń róline erekshe mańyzdy kóńil bóletinin aıta otyra, Ulttyq jobany jergilikti jerlerde júzege asyrýǵa belsendi atsalysýǵa shaqyrdy.

Atyraý oblysyna jumys saparynyń sońynda mınıstr Jylyoı aýdanynda bolyp, jergilikti turǵyndarmen kezdesti, Aqmeshit qorymyna bardy.

Aıta keteıik, qazir eldegi epıdemıologııalyq ahýaldy birtindep qalypqa keltirýdiń arqasynda mınıstrlerdiń óńirlerge shyǵýlary jáne halyqpen kezdesýleri turaqtalyp keledi.
Buǵan deıin Memleket basshysynyń tapsyrmalaryn iske asyrý maqsatynda A.Balaeva osyndaı kezdesýlerdi Nur-Sultan, Almaty qalalarynda, sondaı-aq Batys Qazaqstan oblysynda ótkizgen bolatyn.