Aıda Balaeva ALJIR kesheninde jas tarıhshylarmen kezdesti
Kezdesý «Tarıhı sana – Táýelsizdiktiń rýhanı tuǵyry» taqyrybynda ótti jáne jas ǵalymdar saıası qýǵyn-súrgin jáne asharshylyq tarıhy boıynsha zertteý nátıjelerin aıtyp berdi.
«Táýelsizdiktiń 30 jyldyǵyn atap ótýdiń tujyrymdamasy men is-sharalar josparyna sáıkes, mamyr aıy «Ulttyq birlik, beıbitshilik jáne turaqtylyq» taqyrybymen ótip jatyr, tujyrymdama bıylǵy 31 mamyr - saıası qýǵyn-súrgin jáne asharshylyq qurbandaryn eske alý kúnine erekshe mán beredi», – dedi Aıda Balaeva jas tarıhshylarmen kezdesýdegi alǵysózinde.
Mınıstr qazirgi ýaqytta Qazaqstanda tarıhymyzdyń jekelegen kezeńderin jan-jaqty zertteýge múmkindik bar ekenin atap ótti jáne jas tarıhshylardy osy baǵytta akademııalyq jumystardy atqarýǵa shaqyrdy.
Kezdesýge jas tarıhshylar men ǵalymdar, saıası qýǵyn-súrgin qurbandaryn tolyq aqtaý jóninde memlekettik komıssııa músheleri, ǵylymı-zertteý ortalyqtarynyń, arhıvter men mýzeılerdiń qyzmetkerleri qatysty.
Olar Táýelsizdik alǵannan keıin tarıhty ádil zertteýge, naqty faktilerdi bilýge jáne olardy qaıta oı eleginen ótkizýge múmkindik týyndaǵanyn aıtty.
«Qazaq halqynyń ótken ǵasyrdaǵy 20-30 jyldardaǵy tarıhynyń qaraly betterin zerdeleý, bolshevıkterdiń qylmystary týraly aqıqatty ashý qandaı da bir basqa halyqqa qarsy baǵyttalǵan is-áreket retinde qarastyrylmaýy tıis. Degenmen, tarıh barlyq halyqtardy ótkenniń qaıǵyly qatelikterin qaıtalamaýǵa úıretip, eskertýi kerek. Ásirese, óskeleń urpaqty tarıhymyzdyń aqıqatyna qanshalyqty aşy bolsa da úıretýimiz qajet. Sondyqtan Prezıdenttiń tapsyrmasy boıynsha saıası qýǵyn-súrgin qurbandaryn tolyq aqtaý jónindegi memlekettik komıssııa quryldy. Endi tarıhı qujattardy zerdelep, naqty derekterge negizdelgen senimdi zertteý júretinine senimdimin», – deıdi A. Balaeva.
Aıta keteıik, QR Tuńǵysh Prezıdenti – Elbasy N.Nazarbaevtyń sheshimimen 1997 jyldan bastap jyl saıyn Qazaqstanda 31 mamyr Saıası qýǵyn-súrgin qurbandaryn eske alý kúni retinde atap ótiledi.